Mitaliwan kagahapon sa buntag si kanhi presidente Benigno Simeon “Noynoy” Aquino III sa edad nga 61. Siya maoy ika-15 nga presidente sa Pilipinas.
Samtang tinuod daghang mga ikasaway kaniya atol sa iyang pamunoan gikan 2010 hangtud 2016 tungod sa mga gihulagway sa iyang mga kritiko nga “kapalpakan” ilabi na sa naghinapos nga bahin sa iyang termino sama niadtong Mamasapano massacre, Quirino Grandstand hostage crisis, Zamboanga siege ug uban pa.
Apan mas tataw nga kadaghanan aning mga nanaway wala gyud tinuod makatuhop sa mga isyu kay nadala lang sa mga sulsol ug sa mga way basihanan nga mga balita nga mugna ra sab sa mga kritiko ni Aquino.
Daghan sab ang galagot tungod lang sa iyang pagkaanak og adunahan, nga kini nagagikan sa pamilyang nanagiya sa Hacienda Luisita, nga ang iyang amahan mao si Ninoy Aquino nga nakaingon sa pagputol sa dominasyon sa mga Marcos ug sa mga cronies niini ug daghan pang uban.
Si Aquino ug ang iyang pamilya gitawag nga miyembro sa mga oligarch. Ang oligarch mao matang sa pamunoan nga ang pipila lamang ka mga adunahan ug dunay mga pribilihiyong grupo maoy nagdala sa gahum sa usa ka nasud, kasagaran alang sa ilang kaugalingong interes.
Apan sala ba diay ni Aquino nga anak siya og gamhanan, impluwensiyado ug adunahang pamilya? Dili ba wala man niya iloga ang posisyon pagka-presidente sa Pilipinas kay gibotaran man siya sa katawhan kaniadto?
Duna ba guy presidente sa nasud ang wala mohatag og pabor sa ilang mga suod ug mga pamilya aron makahupot og posisyon sa gobiyerno o ba kaha makakuha og pabor sa mga transaksyon ug mga proyekto sa gobiyerno?
Angay sab tingaling tan-awon sa mga tawo ang mga maayong nabuhat ni P.Noy kontra kurapsyon, pagpatigbabaw sa ‘rule of law,’ mga reporma sa pangobiyerno , modernisasyon sa AFP ug labaw sa tanan ang kadaugan sa Pilipinas batok sa China sa isyu sa West Philippine Sea nga hangtud karon padayong gi-deny sa pipila nga kadtong tinuod nga kadaogan.
Isip pangulo kaniadto sa nasud, makiangayon lang nga hatagan kini og respeto sa iyang pagtaliwan ilabi na gikan sa mga Pilipinong iyang giserbisyohan gikan sa iyang pagkasenador hangtud sa pagkapangulo.