Mibahad si Presidente Rodrigo Duterte nga ipadakop ang mga tawo nga dili magpabakuna o pang tusokan og bakuna sa sampot tungod sa kagahi kuno sa ulo nga dili magpabakuna. Gani giingnan pa niya nga moadto nalang sa ubang nasud kong dili mosunod sa lagda sa Pilipinas. Kini ang dismayadong pulong sa pangulo tungod lagi kuno kay hangtod karon duna pay daghan ang dili gustong magpabakuna, apan murag dili naman seguro ingon niini ang sitwasyon sa pagkakaron. Base sa akong obserbasyon kay halos kada adlaw naa ra man intawong akong nawong sa field mo-cover sa mga vaccination sites, makita nako nga aduna namay daghang mga tawo ang nagpabakuna.
Gani mas daghan na ang nagpanikad nga mabakunahan karon ilabi na kadtong nahisakop sa economic essential workers o A4 sector nga mabalibaran kay dili pa kuno sila pwede kay dili mosugot ang Covax facility nga maoy donor sa bakuna.
Ang daghang supply sa bakuna karon kay kadtong gikan man sa Covax facility busa dili gyud makairog ang vaccination rollout kong inistriktohon gyud ang patakaran. Daghan ang mamasin nga moadto sa vaccination sites o kadtong mga walk-in apan mabalibaran kay lagi kinahanglan nga mosunod sa proseso nga magparehistro online aron ma-schedule.
Para kanako anugon kaayo nga balibaran sila kay sure catch na unta sila, dili na kinahanglan nga kombinsihon sila aron magpabakuna nganong dili naman lang sila bakunahan.
Matud ni Dr. Jaime Bernadas, ang pangulo sa Department of Health Region 7, nga ipaatiman nila ang mga walk-in kay naay mga higayon nga dili makaadto kadtong mga naka-schedule. So imbis masayan ang kahigayonan o ang bakuna, gamiton nalang kini sa mga tawo nga available sa adlaw sa pagpamakuna. Gidugang ni Bernadas nga mapangitaan og pamaagi sa mga LGU nga mahatagan og pagtagad ang mga tawo nga boluntaryong magpabakuna. Aw naa ra man diay ni pangbakunahan na kadtong mga magpabakuna. Kong naay magpabakuna, bakunahan. Ang dili magpabakuna kay nagduhaduha aw biyaan dili na huwaton pa kay mosamot kalangay ang pagkab-ot sa herd immunity kon bisan sa pagpamakuna adunay daghan kuskos balungos.
Pareha sa A5 o mga indigents nga kadtong mga 4Ps ang unahon unya mora’g gahi gahi ni silang kombensihon, ug lisod pud ang pamaagi nga gamiton sa mga LGU kay basin pangayoan og certification sa social welfare service officer ayha bakunahan.
Pastilan samot ka kuti, dili nalang diay igo matamatahon nga moingon nga pobre ni bakunahan ta ni. Hinuon duna may proseso angayang sundon, pero ang pangutana karon makaabot pa kita sa atong gitinguhang padulngan nga herd immunity kong magsige lang og huwat sa mga tawo nga gahig ulo.