Senado naintresado sa EO 17

Sa Executive Order (EO) 17 ni Cebu Governor Gwen Garcia, pag-abot sa OFW/ROF sa Mactan Cebu International Airport (MCIA), ipa-swab test dayon. Human sa tulo ka adlaw’ng pinaabot, kon resulta, ‘negative’, makauli na ngadto sa mga gikamingawang minahal.

Sa ikapitong adlaw, ipa-swab test na sab ang maong OFW/ROF.

Ug bisag ‘negative’ ang resulta, mo-home quarantine gihapog laing 7 ka adlaw.

Sa IATF, mopaabot una’g pito ka adlaw ang OFW/ROF ayha pa ipa-swab. Kon makakuhag ‘negative result’, tapos sa tulo ka adlawng hinuwat, dili gihapon buhian.

Paestaron gihapog laing upat ka adlaw sa accredited hotel/quarantine facilities aron makompletong 14 ka adlaw ang kinatibuk-ang kuwarentinang hugtanong gipatuman sa IATF.

Kon taparon ang EO 17 kontra sa protocol sa IATF, molutaw nga si Garcia adunay dakong paghigugma sa OFW/ROF, samtang ang IATF lain ang gihigugma.

Hunahunaa lang. Sa 14 ka adlaw nilang pag-estar sa hotel, ang mobayad para sa OFW mao ang OWWA (atong kuwarta, mga magbubuhis, maoy gigamit) samtang sa ROF gikan sa personal nilang bulsa.

Sa EO 17, tulo ra ka adlaw ang mabayran sa pagpuyog hotel. Unya, mas protektado ang OFW/ROF kay ipa-swab gilayon upon arrival.

Minus ang risgo sa pagtinakdanay, ikumparar sa IATF nga sa ikapitong adlaw pa.

Sa EO 17, hataas ang mga adlaw nga makauban sa OFW/ROF ilang mga minahal, samtang sa IATF otomatik gikuhaag 14 ka adlaw ang ilang very expensive ug limitadong pagduaw.

Dugang nakamaut, kay ang EO 17 ni Garcia namatud-ang epektibo.

Samtang sa IATF depektoso. Unya, mao pay gipaboran sa Malakanyang.

Nakita kini sa Senado. Gani, nagkadaghan ang Senador lakip na si Senate President Vicente Sotto ang misaludo sa pamaagi ni Garcia.

Busa, sila nainteresado. Ilang giimbitar ang gobernador, isip resource person alang sa public hearing nga gipahigayon didto sa ilang session hall sa Pasay City sa miaging Hunyo 15.

Ang pagsusig balik ug ang pag-amendar sa IATF quarantine guidelines maoy usa sa mga bahin nga ilang gituki. 

Unta, kon unsa man ilang makab-ot nga rekomendasiyon o pandayong balaod nga mopabor sa EO 17, aprobahan dayon kini ni Duterte.

Ang iyang pirma o dili pagpirma, hingpit moselyo-tug-an, kinsay iyang gimahal: ang katawhan, o si Duque?