Ipadakop ni Presidente Rodrigo Roa Duterte ang mga tawo nga magdumili sa pagpabakuna batok sa Coronavirus Disease o COVID-19.
Ang Presidente miingon nga kinahanglan gayud mga magpabakuna batok sa COVID-19 kay kun dili iyang mandoan ang mga opisyales sa paglista sa mga posibling magdala sa virus ug pagdakop nila.
“Basta anaa ka pa sa Pilipinas ug basta tawo ka pa ug posibling magdala ka og virus, kinahanglan magpabakuna ka kay kun dili akong mandoan ang mga kapitan sa barangay sa pagkuha sa lista sa mga tawo nga wala magpabakuna ug nagdumili sa pagpabakona.” Mao ni ang sulti sa Presidente atubangan sa telebisyon niadtong adlaw nga Lunes, Hunyo 21 didto sa Davao City.
Gitahasan usab sa Presidente ang Department of Interior and Local Government (DILG) sa paghimo sa iyang mando sa pagpangita sa mga tawo aron dakpon kun magmagahi sa pagpabakuna aron mapanalipdan ang katawhan sa ilang seguridad ug panglawas. Midugang pa ang Presidente sa pagpapili sa mga tawo sa pagpabakuna o sa pagkapriso.
Si Presidente Duterte usa ka abogado ug prosecutor sa wala pa kini mapiling mayor sa Davao City ug Presidente sa nasud. Busa nasayod kini nga dili krimen ang pagdumili sa pagpabakona apan iya kunong tun-an pagmaayo nga iyang mapapriso ang mga misupak sa bakona ug ang mga wala magpabakona.
Giangkon sa Presidente nga naglagot na siya sa mga tawo nga wala maminaw sa panawagan sa gobiyerno nga magpabakuna tungod kay walay laing tumong sa bakuna kun dili ang pagpanalipod lamang sa katawhan batok sa makamatay nga COVID-19.
Target sa gobiyerno nga mabakunahan ang 70 milyones ka mga tawo sa Pilipinas sa dili pa mapopos ining tuiga aron makabot na sa nasud ang gitawag og herd immunity nga maoy makaputol sa tinakdanay sa COVID-19. Apan anaaa pa lamang sa duha ka milyon ka mga tawo ang nakakompleto sa ilang bakona.
Dili mabasol sa gobiyerno kun nganong nahadlok ang mga tawo sa pagpabakuna tungod kay ang gobiyerno pud ang nagpasiugda o hinungdan sa ilang kabalaka. Sama sa Dengvaxia ug makalibog nga palisiya sa COVID-19.