Ang maayong balita mao nga wa pay timaan nga may tinakdanay na sa Delta variant sa bisan asang bahin sa Pilipinas. Mao na ang pasalig ni Dr. Cynthia Paloma, executive director sa Philippine Genome Center (PGC), kinsa niingon nga ang tanang 17 ka pasyente nga may Delta variant nabantayan sa airports ug mga pantalan sa wa pa makaipon sa populasyon.
Ang di maayong balita mao nga hinay ang genome sequiencing sa PGC, nahunong man gani sa niaging semana kay nahutdan og genome sequencing kits. Gipaabot hinuong abunda nang suplay sunod semana.
* * *
Laing di maayo balita mao ang pasidaan ni Dr. Anthony Fauci, direktor sa National Insititute of Allergy and Infectious Diseases sa Estados Unidos, nga labing mameligro sa pagsulbong sa tinakdanay ang mga lugar nga nasudlan na sa Delta variant nga wa pang kabuylo sa pagpamakuna.
Labing bag-ong report ni vaccine czar Carlito Galvez Jr. niadtong Dominggo, Hunyo 20, 2021, wa pang kaabot og 2% sa populasyon sa Pilipinas ang fully vaccinated. Sa ato pa, kapin sa 98% sa mga Pilipinhon nameligro sa mas mananakod ug mas makamatay nga delta variant.
* * *
Nabiya na pag-ayo ang pagsusi sa PGC unsa na kadaghan ang bag-ong variants sa SARS-CoV-2, ang kagaw sa COVID-19, nga nakasud sa Pilipinas kay nahunong ang ilang operasyon niadtong Marso tungod sa pagkahugaw (contamination) sa ilang mga makina.
Hinaut nga masulbad nang kalibotanong kakuwang sa reagents ug madugangan ang kapasidad sa PGC pagsusi og 750 ka samples kada semana, nga labihan kabiya kon ikumparar sa kaliboan ka bag-ong kaso sa tibuok nasud kada adlaw.
* * *
Mas kabalak-an ang nabantayan sa India nga dugang mutation sa delta variant nga gitawag nila nga “delta plus” nga mas mananakod ug mas grabe pa. Maong sunod sa Singapore, Vietnam ug Hong Kong, nagkadaghan ang mga nasud nga mas nipalapad pa sa swab testing ug nipataas ngadto sa 21 ka adlaw sa quarantine sa mga pasahero sa incoming international flights.
Lahi ang gihimo sa Pilipinas: Hangtod karon wa matuman ang pasalig ni testing czar Vince Dizon nga 90,000 ka swab tests kada adlaw ug gilalisan na unsaon pagpaluag ang quaratine protocols sa mga pasahero gikan sa ubang kanasuran.
* * *