Nanawagan ang Senado ngadto sa Executive Department nga magmabinantayon ug magmakanunayon (consistent) sa pagpagawas og mga pamahayag mahitungod mga polisiya nga ipatuman aron malikayan ang kalibog sa katawhan ug labi na sa tigpatuman niini. Usa niini ka makalibog nga polisiya mao ang hatag-bawi nga lagda sa pagsul-ob sa “face shield”. Kapin na sa tuig ang atong pakigbatok sa COVID-19 apan daw yagaw gihapon ang pagdumala sa atong mga opisyales sa pandemya. Haum kanato ang pagya nga “Dugay ka na sa Manila, tonto ka gihapon.” Giingon bitaw nga ang kalibotan nalangkob sa mga electrons, protons ug neurons. Apan sa pagkuyanap sa COVID-19, daw nadungangan ang kalibotan og bag-ong elemento nga gitawag og MORONS. Pagkatoytoy!
Pahimangno sa danghagan
Giawhag ni DILG Sec. Eduardo Año ang mga lokal nga kagamhanan sa pagpangandam aron sa pagdawat ug pagdumala sa umaabot nga 40 milyones ka doses sa Pfizer-BioNTech nga bakuna sa COVID-19. Angayan ang pagpangandam tungod sa ka-sensitibo sa bakuna nga nagkinahanglan sa tumang pag-amping. Mahisama ang pahimangno ni Sec. Año sa sugilanon sa bibliya mahitungod sa napulo ka dalaga, diin katunga kanila giingon nga maalamon apan ang katunga giingon nga danghag. Sa kalidad sa ubang mga lokal opisyal, hayan adunay maparehas sa lima ka dalaga nga danghagan ug dili gihapon makapangandam bisan sa pahimangno. Saoonz!
Pasumangil inay paningkamot
Mireklamo ang mga sakop sa Alliance of Health Workers gumikan sa giingon’g wala magasto nga pundo sa Bayaniha 2, diin nalangkob niini ang benipisyo alang kanila. Nasayran nga gigamit sa laing katuyoan ang maong pundo. Sukwahi kini sa mga pagdayeg nga gibuhat sa kagamhanan ngadto sa mga medical frontliners lakip na ang pagtawag kanila’g bayani. Mipasalig hinoon ang DOH nga madawat gihapon nila ang ilang benepisyo. Ni’ng panghitabo, haum ang panahom nga “ang prayoridad sa kagamhanan, masuta sa kon giunsa niini pag-gasto ang pundo”. Kon tinuod ang pagpakabana sa DOH, sa mga frontliners, paningkamot ang angay ipakita, dili mga pasumangil. Fezteleern!
Pareho ra sila
Kusganong miawhag si Senador Kiko Pangilingan sa mga social media platforms sa paghunong na sa paghulagway sa mga kandidato karong Eleksyon 2022 nga “panuway” o “demonyo”. Gihisgutan sa senador ang pagtuon sa UP College of Mass Communication nga nagpadayag nga ang mga kandidato sa oposisyon nga “Otso Diretso” maoy labing gihulagway nga “demonyo” o “panuway’ mao’ng walay usa kanila nga nakasulod sa Senado. Ni’ng awhag sa senador, daw nakigstorya lang siya sa iyang kaugalingon. Karaang modus na ang paghulagway nga dautan’g tawo ang kaatbang sa eleksyon. Gani ginaingon man nga sa panahon sa eleksyon, walay nagpuyo sa impyerno kay ang tanang demonyo ania man sa yuta. Paleho la!
Personal notes
Akong mainiton’g pagtimbaya sa ako’ng igsoon nga si NELSON POBLETE nga nagsaulog sa kasumaran sa iyang adlaw’ng natawhan kagahapon, Hunyo 23. HAPPIEST BIRTHDAY, BRO!!!