Dili angay’ng mosulti si Presidente Duterte nga pangdakpon ang mga tawo nga dili magpabakuna og anti-Coronavirus Disease vaccine.
Daghan kaayong gusto nga magpabakuna apan ang problema mao ang kanihit sa vaccines. Dinhi sa siyudad sa Sugbo, temporaryong gihunong sugod kagahapon ang pagpamakuna kay wa nay vaccines.
Daghan kaayo nga nagpalista nga wa pa gyud padad-i og text message aron unta paadtoon na sila sa mga vaccination centers aron mabakunahan. Ang rason kay nihit ang nangabot nga vaccines.
Unya, moingon si Presidente Duterte nga pangdakpon ang dili magpabakuna? Mora’g klaro kaayo nga wa masayod ang presidente sa tinuod nga sitwasyon karon sa vaccination program sa kagamhanan.
Ang maayo niyang isulti mao nga pangdakpon ug prisohon ang mga sakop niya nga nagya-ya lang sa ilang mga trabaho ug mao nga pwerteng gamaya ra sa mga bakuna nga mangabot dinhi sa nasud.
* * *
Nasubo ko pagkakita sa duha ka batan-on nga nangamatay kaniadtong Martes sa hapon kay naigo sila sa kilat samtang nanginhas sa dagat.
Balikon nako pagpahibalo nga ang target sa kilat mao ang “highest object” diha sa mga dapit. Sa ato pa, kon mokilat gani diha sa baybayon, ang tawo nga magbarug maoy labing habog.
Ang maayong buhaton kon magpangilat, kawas dayon gikan sa dagat o kaha, ligid aron dili kamo maoy target sa kilat.
Kanang mga tag-as kaayong antenna sa kuryente ug sa mga tower sa lainlaing estasyon sa radio, gibutangan kana og gitawag nila’g “lightning arrester” nga aron lihayan kini sa kilat, ug kon maigo man gani, dili madaut.
Busa, laoman nako nga nakakuha mo og pagtulon-an niining atong lindog karon.
* * *
Uy, adlaw man diay karon ni San Juan. Sa bata pa ako kaniadto ug nagpuyo mi sa bukid, mangaligo gyud mi sa dagat kada Hunyo 24.
Alegre kaayo sa dagat, ilabi na kon ang San Juan matumong og Sabado ug Domingo. Unya, inighuman sa San Juan, mosunod na usab ang San Pedro-San Pablo matag Hunyo 29.
Pero karong panahona, ilabi na sa mga siyudad, wa na’y nagtagad sa maong mga adlaw. Mora’g hingpit na gyud nga nahikalimtan ang mga kalihokan sa kanhiay nga panahon.
* * *
Kinsa kaha sa atong mga opisyal sa kagamhanan ang makapatukod og Skyway (karsada nga anaa sa ibabaw) ingon man ang karsada nga anha mag-agi daplin sa atong kabukiran.
Kon way kwarta ang kagamhanan, ipaagi gihapon nato ang Build Operate Transfer (BOT) scheme. Kini aron nga kapangandaman nato ang mas grabe pa nga problema sa trapiko sa umaabot nga katuigan.