Ang kagahi sa ulo sa uban makaamong sa tanan

Dul-an sa usa ka tuig na nga nakaginhawa ang Sugbo gikan sa mas hugot nga quarantine restriction diin nagpabilin kita nga ubos sa Modefied General Community Quarantine MGCQ.

Nakabangon na ang mga Sugboanon ilabi na sa ekonomiya nga naghatag og panginabuhi sa mga tawo. Tungod usab sa paningkamot sa katawhan niubos ang kaso sa coronavirus or COVID-19.

Gani nangasuya ang uban ilabi na ang mga dagkong opisyal sa kaulohan sa kalamposan sa Sugbo sa pagpakigbatok sa virus.

Apan sa dakbayan sa Sugbo nisaka na usab og balik ang kaso sa COVID sa nakalabay’ng mga adlaw.

Nasuta sa Emergency Operation Center EOC nga inanay nang nakalimot ang mga tawo sa basic health standards ilabi na dihang gilibkas ang liquor ban kay midagsa na usab ang mga tawo sa mga balay imnanan.

Syempre dili na gyud ma-practice ang quarantine protocols nga napamatud-an dihang dunay mga establismento nga nasakpan nga nakalapas sa lagda sa social distancing ug sa wala pagsul-ob og face mask.

Dili moubos sa napulo na ka mga establimento ang gipadad-an og show cause order. Apan bisan pa man niini padayon gihapon ang mga paglapas sa mga establismento nga wala motuman sa gilatid nga lagda sa kagamhanan.

Dakong hagit sa kagamhanan karon ang pagsusi sa mga dapit nga gitawag nga exclusive resto nga nahimutang sa mga tag-as nga mga building sama sa nasakpan sa Oplan Bulabog sa kapolisan niadtong nakalabay’ng mga gabii sa Barangay Luz nga nahimutang sa ika 21 ka andana ug verlooking gyud ang location.

Daghan ang nangadakpan tungod sa curfew violation kasagaran kanila mga adunahan nga nag-happy-happy niadtong panahona.

Naa pa gani usa ka langyaw nga nakiglalis sa mga pulis kay operator kuno siya og gym nga naa sa building ug 24 oras kuno ang operation sa iyang gym.

Pastilan daghan kaayo og rason ang mga malapason aron lang makalusot sa sala nga nahimo, apan wala silay nahimo kay gipatigbabaw man ang balaod.

Munamunang paningkamot sa mga opisyal sa kagamhanan, mga health frontliners ug labaw sa tanan ang mga yanong yawo nga nagsakripisyo aron dili mataptan sa virus. Halos dili na kaginhawa sa facemask ug face shield apan aniay mga adunahan kuno nga gustong maglingaw lingaw ang makaamong sa atong kahimtang karon.

Ang pagka iresponsable sa uban maoy makaingon nga madamay ang tanan kong mokuyanap na pud ang virus sa Cebu City.

Proud pa unta kita nga daw giisip nga ehemplo sa pamaagi sa pag-control sa virus nga kanhi kita ang epicenter. Kong magpadayon ang kagahi sa ulo sa pipila aw delikado nga mabalik kita sa panahon nga gikahadlokan ang Cebu tungod sa kadaghan sa kaso sa covid 19.

Dili pa man ulahi ang tanan, karon pa lang disiplinahon na ang mga gahig ulo aron motagam, kong mahimo ibalik ang liquor ban kong gikinahanglan aron COVID-19 mapugngan.

Show comments