EDITORYAL - Dami nang gusting magpabakuna pero…
NAGBAGO na ang pagkakilala ng mga tao sa bakuna laban sa COVID-19. Kung dati, marami ang umaayaw at nangangamba, ngayon ay hindi na. Dumadagsa na ang mga tao sa vaccination centers para magpabakuna. Hindi na kailangang takutin ang mga tao ngayon para lamang makumbinsing magpabakuna. Sila na ang kusang lumalapit para mabakunahan.
Katulad halimbawa ng inilunsad na QC Bakuna Nights noong Miyerkules ng gabi sa Quezon City Hall grounds. Dumagsa ang mga manggagawa para mabakunahan. Ginawang gabi ang vaccination para hindi na mag-absent ang manggagawa sa kanilang trabaho. Naging matagumpay ang Bakuna Nights sapagkat maraming nabakunahan. Nagpapatunay lamang ito na marami ang nagnanais mabakunahan para hindi dapuan ng virus. Hindi na nararapat pang pagsabihan o takutin na magpabakuna o mamatay.
Kahit sa Maynila, maraming residente ang gustong magpabakuna. Sa ginawang bakunahan sa Sta. Ana, Maynila noong Lunes, marami rin ang dumagsa at pumila. Pero mayroong pinaalis sa pila dahil para lamang daw sa taga-Punta. Maraming taga-ibang distrito ang umasang mababakunahan din sila kaya nakipila pero yun pala ay ekslubsibo sa mga taga-Punta. Maraming umuwing bigo sapagkat hindi nabakunahan. Maaga pa naman daw nang sila ay pumila.
Ang senaryo ay nagpapakita lamang na maraming mamamayan ang gustong magpabakuna. Maraming nagtutungo sa vaccination site at nagbabakasakaling mabakunahan pero hindi matupad dahil hindi sapat ang suplay. Kulang ang suplay ng bakuna.
Ang mga nangyayaring ito na marami nang gustong magpabakuna ay kumukontra sa sinasabi ni President Duterte na marami raw tumatangging magpabakuna. Kaya nagbabala siya sa mga tumatanggi na magpabakuna o mamatay? Bumili na lang daw ng kabaong o kaya’y magpasunog.
Hindi na dapat takutin ang mamamayan. Marami nang gustong magpabakuna. Ang tanong may sapat bang suplay ng bakuna para sa mamamayan. Ang tanungin muna niya ay ang DOH at IATF.
- Latest