Bayad sa utang

Dili pa lang dugay, may usa sa duroha ka mamumuno nga mipusil-patay sa usa ka amahan, kinsa samtang natulog tupad sa tulo ka gagmay pa kaayong anak ug asawa, may mga pulong nga gipalanog: “Bayad na kini ninyo sa utang nga walay bayadbayad!”

Ug misiyaok ang nagpungasing bala nga gilubong sa ulo ug kalawasan sa wala na makamatang amahan.

Mituasik ang init pang dugo ug didto kini motugpa sa nawong ug ubang parte sa lawas sa mga linghod pa kaayog salabotang anak, kinsa sa edad pa lamang nga 3, 4 ug 5 anyos, nasaksihan na ang makalilisang paagi giunsa pagpatay ang construction worker nilang amahan?

Naestatuwa ang inahan ug nabiyudang asawa samtang naghunahuna sa giingon sa mamumuno nga ‘bayad sa utang.’

Bisag unsaon niyag subay, wala siyay mahinumdoman nga nakautang sila? Walay gisulti iyang kapuyo bahin niini. Ug nganong gipatay man?

Hinuon, matud pa sa kapolisan nga miimbestigar sa maong krimen, ilang nasayran nga maldito kuno ang naasoy’ng gipatay didto sa ilang dapit. Basig may mga nabangga kini ug sa hilom nagdumot nga wala lang masayri sa asawa. Pagdumot nga misangko sa kamatayon, isip bayad sa utang.

Apan husto ba ang maong paagi sa pagpabayad sa utang?

Nakabayad ba sa mga mata sa Ginoo ang nakautang nga gipatay?

Wala! Unsaon man niini pagbayad, nga gipatay man siya sa giutangan?

May tulobagon gihapon siya didto sa Kahitas-an. Apan hinumdomi. Gidili sa Diyos ang pagpatay sa Iyang mga binuhat.

Karon, sa mga mipatay sa nakautang, segurado ba silang nakabayad na ang nakautang nila? Or, sila na hinuon maoy nakautang sa atong Magbubuhat?

Ang 1 Corinto 6:19-20 miingon: “Wala ba mo masayod nga ang inyong lawas, templo sa Espiritu Santo nga naa ninyo, hinatag sa Diyos? Dili na mo tag-iya sa inyong kaugalingon.

 Hinumdomi, ang presyo sa gibayad (nga mao ang pagpakamatay ni Hesus sa krus) alang ninyo. Busa, himayaa ang Diyos sa lawas ug espiritu nga Iya sa Diyos.”

Nga sa ato pa, kon patyon nato ang tawong nakautang, sama ra nga gigun-ob-patay ta ang templo sa Ginoo. Busa, pagkadako diay sa atong utang Kaniya kon ato ning buhaton.

Unta, likayan nato kini sa tanang panahon?