EDITORYAL - May padulngan kaha?

Gipaabot nga ipadaplin lang ug dili tagdon ni Pres. Duterte kining kasikas sa International Criminal Court mahitungod sa pag-request ni outgoing ICC chief prosecutor Fatou Bensouda og imbestigasyon kabahin sa duguong drug war sa Pilipinas.

Ang tigpamaba ni Duterte nga si Harry Roque miingon nga dili mokooperar ang pangulo sa maong imbestigasyon ug masaligon siyang dili tagdon sa ICC pre-trial chamber ang request ni Bensouda.

Para kang Roque, pagusik-usik lang sa oras ug kwarta kun tugotan ang maong imbestigasyon nga sa iyang tan-aw walay padulngan tungod kay dili man mokooperar ang Pilipinas.

Kahinumdoman nga gipasakaan og reklamo ngadto sa ICC ang administrasyong Duterte tungod sa matud pa paglapas sa tawhanong katungod  sa mga drug suspects sa drug war niini.

Si Roque miingon nga dili makabarog ang kaso batok sa pangulo kun pulos lang sa “estorya-estorya” ug kun ang mga pasangil nagagikan sa matud niya mga komunista ug sa mga kritiko ug kaatbang sa politika sa pangulo. Mahimong may kamatuoran ang mga pasangil ni Roque, apan dili ikalimod nga nagsugod kining mga reklamo pagsugod palang og lingkod ni Duterte niadtong 2016.

Sa pagkakaron  giimbestigahan og balik sa Department of Justice ang kapin singko mil ka mga kaso sa nangamatay nga drug suspects atol sa anti-illegal drugs operations sa kapolisan sa nasud.

Base sa mga reports sa media, sobra pa sa singko ang mga nangamatay sukad sa tuig 2016 sa pagsugod sa drug war.

Ang mga kritiko sa pangulo mihulagway nga kining gihimo sa DOJ pamaagi lang kini aron ipakita nga dunay gibuhat ang gobiyerno pagsulbad sa mga gidudahang extra-judicial killings ug aron ipakita nga nisanong ang Pilipinas sa obligasyon niini sa international community pagtahod sa tawhanong katungod.

Kun mokooperar lang ang Pilipinas, mas mapadali sa ICC ang ilang trabaho kay mandoan sa presidente ang  mga ahensiya sa gobiyerno nga tabangan ang imbestigasyon.

Apan lisod kining mahitabo sanglit gi-withdraw na ni Duterte ang obligasyon sa Pilipinas sa Rome Statute.

Ang Rome Statute mao ang naghatag og gahom sa ICC paghimo og imbestigasyon sa mga malapasong gobiyerno nga nilagda sa kasabotan.