Dugay nga hustisya

Gimando sa Korte Suprema ngadto sa namatay nga si Herminio Disini nga kaalyado sa namatay na usab nga Presidente sa Pilipinas nga si Ferdinand Marcos ang pagbayad ngadto sa gobiyerno og P1 bilyon  isip temperate nga danyos ug P1 milyon isip exemplary nga danyos tungod sa iyang papel sa paghatag sa Bataan Nuclear Power Plant (BNPP) nga proyekto ngadto sa Westinghouse Electric Corporation nga nagkantidad og $2.2 bilyones.

Ang Korte Suprema mideklarar kang Disini nga manubag tungod sa iyang pag inpluwensiya sa paghatag sa BNPP nga proyekto ngadto sa Westinghouse gamit ang iyang kasuod ngadto ni Presidente Marcos. Si Disini namatay na niadtong tuig 2014.   

Dose ka mahistrado sa Korte Suprema ang mipagawas sa ilang unanimous nga hukom samtang ang duha ka mahistrado nga sila si Chief Justice Alexander Gesmundo ug Associate Justice Amy Lazaro-Javier wala mosalmot sa deliberasyon tungod kay nagsilbi silang abogado sa Presidential Commission on Good Government (PCGG) dihang konektado pa sila sa opisina sa Solicitor General (OSG).

Ang PCGG miduso og reklamong restitution ug damages batok kang Herminio Disini, Ferdinand Marcos ug asawa niini nga si Imelda atubangan sa Sandiganbayan niadtong tuig 1987 diin ang Sandiganbayan mideklarar kang Disini nga manubag niadtong tuig 2012 tungod sa pagdawat og komisyon gikan sa Westinghouse Electric Corporation og $50 milyones ug mipawalay sala sa magtiayon nga Marcos tungod sa kakuwang sa ebidensiya. 

Sa kasong ilang gipasaka, ang PCGG namasangil sa Westinghouse nga migamit sa inpluwensiya ni Disini nga mamahimo nilang Special Sales Representative aron maseguro ang ilang pagkatudlo isip main nga kontraktor sa BNPP nga proyekto ug sa pabor nga termino nga may tulo ka porsiyento nga komisyon sa kantidad sa kontrata.

Ang kaso gipasaka sa Sandiganbayan niadtong 1987 ug gihukman niadtong 2012 dayon ang hukom gi-review sa Korte Suprema kansang hukom gipakakanaug niadto lamang Hunyo 15, 2021. Sa kinatibuk-an miabot og 34 ka tuig ang paghukom. Ingon ani ka dugay ang hustisya sa Pilipinas