Talawan apan komedyante

Giawhag ni Presidente ang mga Pilipino sa pagsunod sa mga panig-ingnan nga gipakita sa atong mga bayani samtang nakigbisog ang nasud sa COVID-19 pandemic.  Dugang pa sa Presidente, ang mga hagit sa nangagi’ng tuig misuway sa atong kinaiya isip usa ka nasud ug nagtawag kanato nga mahimo bayani alang sa kaayohan sa kinabag-an.  Kinahanglang nga adunay gibatunan’g kaisog ang tawo aron siya mahimong bayani.  Apan matud pa sa pagya, “kon gipakatawo ka nga talawan, paningkamuti lang nga maantigo ka mopakatawa sa uban”.  Joke, joke, joke!

Dili na mobalik

Gipahibalo ni Sec. Harry Roque nga gitugotan na ang mga senior citizen nga mogawas sa ilang panimalay sa kondisyon nga human na sila mabakunahi ug padayon sila’ng motamod sa health protocols.  Tungod sa COVID-19, nagkabayloay na ang kahimtang sa ginikanan ug anak. Inay ang anak ang bantayan, ginikanan na karon ang did-an.  Kining pagkabayloay sa kahimtang makapahinumdum sa driver nga gidakop sa enforcer kay misulod sa one-way nga dalan.  Apan dali nga nangatarungan ang driver sa pag-ingon, “Ngano diay kon One-way? May’g mobalik ko”. Pagkatoytoy!

Malisod gubaton ang China

Namulong si kanhi USec Eliseo Rio, Jr., usa ka retiradong heneral, nga dili lamang pagpakig-gubat ang kapilian sa Pilipinas pagsulbad sa kasungi-an diha sa West Philippine Sea.  Ni’ng maong pamahayag, igo ra gisulti ni USec Rio ang nasayran na sa tanan. Dili mahimong makig-away ang hulmigas sa kabaw.  Napatik tinuod sa bibliya ang sugilanon ni David batok sa higanteng Goliath tungod kay midaug man si David.  Apan dili kita maglaum sa susamang kadaugan ni David kon ugaling makig-gubat kita sa China.  Kini’ng maong stratehiya sama ra nga nagkalot kita’g lungag sa baybayon aron adto ibalhin pagsulod ang dagat.  May’pa’g moligeed!

Wala mahisulat sa tubig

Mipasalig ang MCWD nga walay pagsaka sa presyo sa tubig nga ipatuman hangtud nga dili pa masinati sa mga konsumidor ang ka-abunda sa tubig nga modangat kanila.  Aron matuman ang maong pasalig, mangita ang MCWD ug laing tinubdan sa tubig sama sa mga kasapa-an, dagkong linaw ug mga tubod.   Dugay-dugay na nga giantos sa katawhan ang suliran sa kakulang sa tubig.  Ang saad nga dili patas-an ang presyo niini makahupay sa naghig-waos nga galamhan sa mga konsumidor.  Hinaut nga wala mahisulat sa tubig ang maong sa-ad.  Baya no!

Ngano’ng gi-opawan?

Giimbestigahan sa Commission on Human Rights (CHR) ang giingon’g pag-upaw sa mga ulo sa unom ka mga babaye nga nagpangedaron og 16-20 anyos didto sa Ampatuan, Maguindanao isip silot sa ilang pagka-tomboy. 

Alang sa CHR, diskriminasyon ang pagbuhat sa ingon labi na kon mamatud-an nga gipasikad kini sa ilang sexual orientation.  Adunay mga taho nga pagtuo sa pagtulon-ang Islam maoy hinungdan sa pagpang-upaw sa naasoy’ng mga babaye.   Dili sama sa unang panahon nga opawan ang bata tungod kay napuno sa kuyamad ang alimpatakan.  Shampoo is life!