Kinsay mobayad sa saup

Dear Atty. Divine,

Usa ko ka saup ug ang akong giugmad nga yuta ibaligya na sa tag-iya. Matud sa tag-iya sa yuta nga iya daw sultian ang buyer nga bayran ko lakip na sa akong mga tinanum nga lubi kay lagi bag-o na man ang tag-iya sa yuta nga akong giuma.

Sa dihang akong naestorya ang buyer, miingon sad siya nga dapat ang seller daw ang mobayad nako. Ang akong pangutana, kinsa man gyud ang dapat mobayad sa saup, ang buyer o ang seller? Pila man sab ang dapat nako nga ipabayad? Daghang Salamat

Dorothy

* * *

Dear Dorothy,

Basi sa balaod, ang saup bisan kun laing tawo na ang tag-iya sa yuta magpabilin kining saup. Apan sa imo nga kaso, kun ikaw gitanyagan  nga bayran ug mosugot sab ka niini mamahimo ra sab kini kay inyo man kanang kabubut-on ug nagkasinabot man mo.

Apan ang tag-iya sa yuta mao gyud dapat ang mobayad nimo kay iya man kang saup. Dili mahimo nga iyang ipasa sa buyer ang pagbayad nimo gawas lang kun ang buyer mosugot nga siya maoy makig-settle nimo.

Kalabot sa kantidad kun pila dapat ang imong bayad, magdepende gyud na sa imong gidugayon pagtikad sa yuta, pila ka punoan sa lubi ang imong natanum.

Mas maayo nga adto ka mangayo og tambag sa Dept. of Agrarian Reform o DAR kalabot sa kantidad nga dapat nimong ipabayad sa tag-iya say uta. Thanks and God bless.

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.