Maayo pa ang manok

Midaghan ang mga Pinoy nga nawad-an og trabaho sa bulan sa Abril apan matud ni Sec. Roque, dili kini kahibudngan kay resulta kini sa estrikto’ng lagda sa kwarantinas.  Hinoon, segun sa panglantaw ni Sec. Roque, makabawi ra gihapon ang sector sa pamuo tungod sa gipahimutang nga mga fiscal policies.  Daw nahulog sa panugal ang pagdumala sa kagamhanan sa isyu sa unemployment: Pilde karon, Bawi unya. Kon magpadayon ang maong sistema, mas maayo pa tingale ang manok kay sa tawo. Daghang tawo ang naut-ot tungod kay misugal sa manok, apan walay manok nga napurdoy kay mipusta kini sa tawo.  Baya no!

 “Present” o “guilty”

Tun-an sa Senado ang gipangayo sa administrasyon nga dugang P25 bilyones aron ipalit og bakuna batok COVID-19.  Alang kang Senador Lacson, daw subra ra ang gipangayo nga kantidad labi na kay aduna na’y nagahin nga P82.5 bilyones alang niini ubos sa Bayanihan 2. Nabalaka ang senador nga kawkawon ra ang sobra’ng pundo.  Daghan na ang asoy sa kurapsyon panahon sa pandemiya apan wala’y dakong opisyal nga napasakaan og kaso.  Haum ang pagya nga nag-ingon, “Kon adunay roll call nga pagabuhaton sa gobiyerno, maglibog ang mga opisyales kon unsay itubag: “Present” ba o “Guilty”. Hala no!

Angayan palandongan

Miawhag si MCWD Chairman Jose Daluz ngadto sa Cebu Chamber of Commerce and Industry (CCCI) nga inay sawayon ang mga laraw sa MCWD, angay nga mohatag ang CCCI sa ilang proposal unsaon pagtubag ang kakulang sa tubig.  Gisaway sa CCCI ang laraw pagpasaka sa presyo sa tubig labi na atol sa pandemiya.  Adunay punto ang CCCI ug dili usab nila mandato ang giawhag ni Daluz.  Kinaiya na sa tawo nga malipay sa mga pagdayeg bisan makadaut kay sa mga pagsaway nga makaluwas.  Dili lang unta nato isipon nga ang tanan’g nanaway nasilag kanato.  Ang uban kanila nagsulti lang sa tinuod.  Angayan palandongan!

Return to sender

Segun sa balita, gipusil-patay ang usa ka tigbuhat og lapida nga si Carl Eric Garces sa suspetsado nga giila lang sa ngalan nga Eddieboy human nagkalalis ang duruha  gumikan kay wala mahuman ang gi-order nga lapida sa naulahi.  Ni’ng kamatayon sa tigbuhat sa lapida, inay alang sa nag-order, ipahinungod na kaniya ang himoon nga lapida.  Haum ang panultihon nga nag-ingon, “Ang mga butang nga nagtuyok, mobalik ra gihapon sa dapit sa nagpatuyok”.  Sa post office pa, “Return to Sender”. Saoonz!

Paabtikay lang

Adunay laraw si Konsehal Phillip Zafra nga mag-establisar og food terminal dha sa South Road Properties (SRP) aron mahatagan og luna ang mga mag-uuma alang sa ilang produkto.  Maanindot ang maong laraw kay malikayan na ang mga middleman nga maoy hinungdan nga momahal ang presyo sa mga produkto.  Apan kinahanglan dali ug abtik ang kagamhanan kay basin maunhan sila sa mga middle man paghimo og paagi nga malutsan ang regulasyon.  Kon maunhan, inay molambo, mosamot hinoon kaut-ut ang mag-uuma. Paabtikay lang!