Ang pagsuway

Sa gipahigayon nga tigum sa national council sa partidong PDP-Laban sa Sugbo, ilang gipalabang ang usa ka resolution nga nagtukmod kang Presidente Rodrigo Roa Duterte sa pagpapili pagka bise presidente sa umaabot nga 2022 nga nasudnong eleksiyon. Sa samang resolution gihatagan usab og gahomsi Duterte sa pagpili sa iyang Presidente nga makauban sa pagpapili.

Daghan ang gipalutaw sa mga dumadapig sa Presidente nga puwede niyang makauban hinungdan nga gihatagan siya sa iyang partido og katungod sa pagpili si kinsa sa mga pangalan nga milotaw ang gusto niyang makauban.

Usa sa mga pangalan nga milutaw ang pangalan ni Davao City Mayor Sara Duterte. Kun ugaling mahitabo, mahimong Duterte-Duterte ang pangbato sa administrasyon batok sa mga kandidato sa oposisyon.

Ang Duterte-Duterte nga panag-uban sa umaabot nga nasudnong piniliay usa ka ekspirimento nga magsuway sa panag-uban sa anak ug amahan sa pinakataas nga posisyon sa nasud sa Pilipinas.

Sa lokal nga piniliay sama sa posisyon pagka bobernador ug bise gobernadot, pagka mayor ug bise mayor ug bisan sa pagka kapitan sa barangay ug pagka konsehal makadaghan na nga higayon nga nasuwayan ang panag-uban sa bana ug asawa, asawa ug bana, amahan ug anak, anak ug amahan, inahan ug anak ug anak ug inahan.

Nahitabo na usab nga may mga anak og presidente nga napili pod nga presidente sa Pilipinas sama nila ni Presidente Gloria Macapagal Arroyo nga anak ni Presidente Diosdado Macapagal ug Presidente Benigno Simeon C. “Noynoy” Aquino nga anak ni Presidente Corazon “Cory” Aquino.  Sa pagka presidente ug bise presidente una pa kini kun madayon ang kagustohan sa mga dumadapig sa mga Duterte.

Kun madayon ang Duterte-Duterte nga tandem sa 2022 nga nasudnong piniliay, dinhi masuwayan ang ka mature sa mga Pinoy sa pagpili og presidente ug bise presidente. Dinhi usab nato masukod kun ang kagustohan sa mga dumadapig sa mga Duterte kagustohan ba usab sa katawhan sa Pilipinas.