NIATF gitamparos sa EO 17

Nadayon ang panagtagbo nila ni Cebu Gov. Gwen Garcia ug Presidente Rodrigo Roa Duterte didto sa Malakanyang sa miaging Lunes sa gabii aron pagladlad, pagtuki ug pagpahayag sa mapuslanong unod sa iyang Executive Order 17.

Sama sa heneral nga misulong sa panggubatan, hetsas siya sa mga armas ug bala uban nila ni Presidential Assistant for the Visayas Michael Lloyd Dino, Project Balik Buhay Chairman Edmund Liu, IATF-MEID Visayas head General Melquiades Feliciano ug Department of Health (DOH) 7 Spokesperson Dr. Mary Jean Loreche.

Dihang gikaharang na nila si Health Secretary Francisco Duque III, DILG Secretary Eduardo Año, Vaccine czar Secretary Carlito Galvez Jr., Senator Bong Go ug Presidential Spokesperson Harry Roque sa atubangan ni Duterte, mipakapaka dayon ang nanglupad pamahayag-pasabot ni Garcia sa EO 17.

Base sa press conference nga gipahigayon ni Gob. Gwen tapos sa ilang panagtagbo, makita ang pagkaserado’g utok ni Duque.

Diin, dili kini uyon nga pag-abot pa lang sa OFW/ROF sa airport, ipa-swab test dayon. Kay ang iyang ikaunom ka adlaw gyod maoy ipatuman. Kay kuno, grabe kapaspas manakod ang virus.

Dihadiha, nangutana si Garcia, unsa bay kalainan sa resulta sa swab test nga ipahigayon upon arrival ug sa paabton pa’g six days?

Dili ba mas kuyaw, taas hinuon ang risgo sa pagtinakdanay kon kini dugaydugayon?

Dugang gastos pa sa gobiyerno ug OFW/ROF. Gani, pipila kanila, nangutang aron lang makauli.

Misuki si Duque. Okay ra kuno. Kay may budget atong gobiyerno para niini.

Pastilan, misamot kahaguka ang rason ni Duque ug ubang taga NIATF human maigo sa tin-aw’ng pamahayag ni Garcia bahin sa EO 17 nga daw dakong tamparos nga milagapak sa ilang nawong. Genuine datas and documents ang gihuptang pambato ni Garcia. Busa, bug-at. Hait!

 Masakitan gyod ang maigo.

Hisabtan ni Duterte ang latasong kalbaryo sa manguliay’ng OFW/ROF. Busa, gimandaran si Duque nga tun-an pag-ayo ang EO 17. Diin, pagka-Hunyo 3, may resulta na.

Unta mahumok ang kagahi niining gipiling DOH Secretary ni Tatay Digong, nga dugay nang wala mauyoni sa katawhan ug sa Senado tungod sa kapalpakan ug pagkahilambigit sa mga dagkong kontrobesiya.

Apan, pinangga ug protektado gihapon sa atong presidente. Ngano kaha?