Bayanihan 1 ‘the best’ sa buong mundo – IBP
Apat na bansa sa buong daigdig ang kinilala na may best program laban sa COVID-19 pandemic at kabilang dito ang Pilipinas at ang Bayanihan 1 to Heal as One nito. Bukod sa ating bansa, kasama sa tumanggap ng parangal ang Australia, Norway at Peru.
Ang pagkilala ay mula sa International Budget Partnership (IBP), isang independent watchdog organization na nagtataguyod sa transparent, inclusive, at accountable budget process ng mga pamahalaan sa buong mundo.
Naisabatas ang Bayanihan 1 nang si Taguig Rep. Alan Peter Cayetano pa ang Speaker ng Kamara de Representante. Pinagpuyatan ito ng mga kongresista sa kauna-unahang hybrid session sa kasagsagan ng pandemya noong nakaraang taon. May mga kongresista ang nasa plenary hall noon at ang iba sa mga ito ay dumalo via Zoom.
Kasunod ng Bayanihan 1, isinabatas din noong nakaraang taon sa Kamara ang Bayanihan 2. Follow-up stimulus package ito sa Bayanihan 1. ‘Di ko lang maintindihan kung bakit tila makupad ngayon ang liderato ng Kamara sa pagsasabatas ng Bayanihan 3. Porke ba’t hindi na-certify na urgent bill ang panukala ay ‘di na dapat aksyunan nang mabilis gayong malaki pa ang problemang kinakaharap ng ating bansa dahil sa COVID-19?
Ang Bayanihan 1 ang unang batas na pinagtibay laban sa epekto ng COVID-19 sa kalusugan, kabuhayan, at kapakanan ng mga Pilipino. Umaabot sa P275 bilyon ang kabuuang pondo ng Bayanihan 1 na inilaan para sa pagbibigay ng Social Amelioration Program (SAP) sa milyun-milyong Pilipino. Ito rin ay pinambili ng PPE ng frontliners, testing kits, medical supplies at pagtatayo ng quarantine facilities at isolation centers para sa COVID-19 patients.
Ito ay nagbigay ng kapangyarihan kay President Duterte na harapin ang pandemya sa pamamagitan ng re-allignment, reallocation at reprogramming ng kaban ng bayan laban sa COVID-19.
Ang nakalulungkot, tig-P1,000 lang na ayuda para sa bawat Pilipino ang nakapaloob sa Bayanihan 3. Ano ba ang magagawa ng P1,000 sa totoo lang? Sana naman, naiisip ng ating mga mambabatas na hindi na lang ito pantawid kundi pang-ahon na. Sa mga pinagpipitaganang mambabatas, unahin ang pantulong na kinakailangan
ngayon ng taumbayan, maging responsive naman sa tawag ng panahon.
- Latest