Balaud haguka kayo

Giklaro sa kadagkoan sa Commission on Elections nga sila wa g’yuy mahimo batok sa mga tawo nga gustong molansar sa 2022 elections nga naghimo na og sayo nga pagpangampanya. Unsaon, ang atong balaod gud mosilot ra man niadtong nakaduso na sa ilang Certificates of Candidacy unya mohimo’g sayo nga pangampanya, kay kon wa pa makaduso og COC dili pa man kuno kandidato.

Karon, makakita ka na og mga politiko nga moanha sa inyong kabarangayan nga sa nanglabay nga mga buwan o kaha katuigan, wa gyud magpakita kaninyo. Inyo silang makita nga dagko na kaayo’g mga ngisi.

Kadtong mga politiko nga way undang sa pagbisita sa kabarangayan ug mitagad sa mga problema sa katawhan, sila maoy angay nato nga suportahan, ug dili kining mga tawo nga mokalit lang pagtunga atol ra sa kampanya.

Unsaon, daghang katawhan ang mobotar lang kay nakadawat og suborno gikan sa mga politiko. Duna unta’y balaod nga mosilot niini, ug apil nga masilotan ang mga politiko nga mamalit og botos, apan wa gyuy nasilotan.

Gihimo lang kataw-anan ang atong balaod. Samtang gidid-an ang mga kandidato paggasto og subra sa P3.00 sa kada botante, apan gimaniobra lang nila ang Statement of Contribution and Expenditures nga giduso sa Comelec.

Natan-aw nako nga daghan gyud ang gustong makig-tandem kang Davao City Mayor Sara Duterte kon modayon kini paglansar pagka presidente sa nasud.

Sa ako lang nahibaw-an ug nabasahan sa balita, miadto na kang Inday Sara si kanhi senador Bongbong Marcos, ug karong bag-o si kanhi Defense Secretary Gibo Teodoro.

Nasabot nako nga sila si Bongbong ug Gibo, andam nga modagan pagka bise presidente ni Sara. Sa ato pa, mura’g inilog si Sara kay daghan ang gustong makigpares.

Daghan usab kaayo nga mga grupo sa lainlaing dapit sa nasud, midasig ni Inday Sara nga molansar pagka presidente kay gitan-aw nila nga mao kini ang takus nga modumala sa atong nasud.

Nasayod sila nga si Senador Manny Pacquiao nagtinguha sab nga molansar, pero wa kita makadungog nga dunay daghang gustong makigpares sa international boxer.

Nasayran nako nga karong Domingo, ipahigayon ang gitawag nila og Visayas launching sa “Duterte PaRin” movement anha sa usa ka dakong hotel. Ang kalihokan pagapangulohan nilang National Secretary General Niño “Bonito” Padilla ug sa deputy Secretary General for Visayas, Dr. Winley Dela Fuente.

* * *

Uy, mura’g si Cutie Del Mar, molansar man kuno siya pagka kongresista sa Cebu City north district. Tan-aw nako, panington gyud og bugnaw si Cutie kay daghan siya’g lig-ong kontra.