EDITORYAL - Daghang malapason

Nabantayan karon nga samtang nagkadaghan na ang mga tawong nakagawas-gawas sa kadalanan, daghan na sab mga tawo ang nilugak sa ilang pag-amping ug wala magtarong pagsunod sa nagpabiling minimum health protocols kun mogawas sa panimalay.

Diha lang sa dalan Manalili, matag alas-11 hangtud alas-12 sa udto daghang magtapok-tapok nga mga tawong nalambigit aning pagpamalit og mga guba nga cellphone ug uban pang gadgets.

Gawas nga wala na mosunod sa social distancing ug wala magsuot , dunay uban nga wala na magtarong og suot sa ilang facemask. Samtang nabantayan sab nga diha sa mga pasaheroan, dunay mga sakyanan nga wala na sab mosunod sa hustong kapasidad pinasubay sa health protocols.

Ang matag barrier nga para sa usa lang ka pasahero duna nay nagdoble-doble , samtang nabantayan sab diha sa mga nagdagang bus pasaheroan nga dunay pipila ka pasaherong wala magsuot og facemask ug daghan sab ang wala na magsuot og faceshields.

Kining mga ingon niini nga pagpasagad dili lang unta moresulta sa pagsaka og balik sa daghang mga kaso sa Sugbu.  Magmatngon unta ang publiko pagsunod niining mga simpleng minimum health protocols bugti sa pagluag sa restriksyon tungod kay kung ugaling mosaka og kalit ang mga kaso mausik lang tanang paningkamot sa gobiyerno.

Karong bag-o, gisugyot ni Manila City Mayor Isko Moreno nga wagtangon na ang pagpagamit og face shields tungod kay sa pagkakaron matud niya ang Pilipinas nalang maoy padayong nigamit niini.

Kung wagtangon kini, way laing masakitan kondili ang mga importer ug namaligya niini, sagad gikan sa China. Apan angay na ba gyud nga wagtangon na kining paggamit og face shields sa mga pangpublikong lugar karong panahona?

Tinuod duna nay bakuna, apan wala pa gani kaabot og 10 milyones ka Pilipino ang nakakompleto niini.

 Ang gobiyerno naningkamot nga makab-ot ang heard protection o herd immunity pinaagi sa pagbakuna sa 70 milyones ka Pilipino gikan sa kapin 100 milyones nga populasyon niini. Apan dili kini madali sa mosunod nga usa ngadto sa duha ka tuig sanglit nag-agad lang ang Pilipinas sa donasyong bakuna pagkakaron.

Dili maayong ipadaplin ang proteksyon sa minimum health protocols may bakuna man o wala.