Dugo sa amahan

Naligo sa dugo sa ilang amahan nga gipulipolihan sa pagpusil sa duha ka mamumuno samtang natulog sulod sa ilang panimalay sa usa sa mga Barangay sa Lungsod sa Tuboran lalawigan sa Sugbo ang mga bata nga nag-edad pa lamang og tulo, upat ug lima.

Ang biktima nga nag-edad og 35 ug usa  ka construction worker gipusil samtang natulog tupad sa tulo niya ka anak nga gagmay pa ug asawa.

Asoy sa asawa nga nakamata siya dihang gisikaran ang pultahan sa ilang balay sa duha ka mamumuno nga dayon usab nga mipusil sa iyang bana. Dugang asoy sa asawa nga unang mipusil ang usa sa mamumuno ug migawas. Human sa pagpamusil migawas kini ug mibanos kaniya sa pagsulod sa balay ang kauban niini ug mitiwas pagpusil sa iyang bana.

Sa pagbiya sa duha ka mamumuno nagbilin kini og pulong nga ang ilang gihimo bayad sa wala mabayri nga utang sa biktima. Mao ni ang nakapait sa kinabuhi sa mga kabus nga ang kasagaran nabuhi sa utang.

Wala ta masayod kun unsa nga matang sa utang ang giutang sa biktima. Utang ba kini kay gipalit og bugas o utang ba kini tungod sa bisyo. Pila ra kaha nato ang walay utang. Ang utang makatabang ilabi na sa atong kagipit sa salapi maong dili ni puwede nga limotlimotan lamang sa nangutang bisan paman kini og gipatuboan sa nagpautang kay dili ikalimod nga nakatabang pod sila sa atong kalisod.

Ang tambag lang nako sa mga mangutang, ayaw pangutang og subra sa imong kita. Banabanaa ang imong gasto ug ibasi kini sa imong kita. Ayaw paggasto og subra sa imong kita aron dili ka makapangutang. Pugngi ang imong kaibog sa mga butang nga wala kaayo kinahanglana. Makontento lang ta kun unsay anaa kanato.

Unsa kahay ugma sa tulo ka mga bata nga gipatay diha mismo sa ilang tupad.