Respeto lang sa bike lane

Nindot kaayo tan-awon ang green bike lane sa dakbayan sa Sugbo nga makabihag sa mga mata dili lang sa mga bikers apil sa ubang motorista nga makakita niini.

Seguro nahibawo naman ang tanan sa tumong niini ug para kang kinsa man kining green lane kay sa ngalan pa lang “Bike Lane” bisan piyongan tataw kaayo nga sa mga bikers kini.

Apan makadismaya tan-awon nga nagpakabuta ang ubang motorista nga walay respeto sa bike lane kay gihimo man nila kining parkingan ilabi na diha sa may Fuente Osmeña.

Bisan pa og mag-hazard signal ang mga sakyanan nga upat ang ligid kay seguro importante kaayo ang ilang gikanaug apan dili kini rason nga mo-disrespect sila sa lane nga dili para nila.

Sa una nga wala pa ma-establisar ang bike lane diha mamahimo ra gyud nga makaparking kadyot basta naa lay driver. Apan unsaon man nga niabot na ang panahon nga bawal na busa mosunod nalang unta sa lagda sa syudad.

Mangita nalang og laing kaparkingan baha og layo layo ang lakwon unsaon nga naa may balaod nga angayang sundon.

Sa mga armored car sa bangko dapit sa Fuente seguro makonsiderar sila kay security risk man ug dili man pud magdugay. Apan kanang ubang sakyanan nga gusto lang magpasayon aw ayaw na mo parking sa solid green lane kay mag viral gyud mo kong makuhaan og hulagway.

Pwede ra man nga mag-load ug unload pero parking ayaw nalang gyud aron dili madakpan.

Bisan unsa pa ang katarongan sa pagparking dili na mahimo kay naa may lagda nga gikinahanglan tumanon.

Kahinumduman nga naumol ang konsepto sa pagmugna og bike lane niadtong panahon sa ECQ sa Cebu diin walay masakyan ang mga tawo ug ang bike lang ang madalidali.

Ang purpose aning bike lane mao ang kaluwasan sa mga bikers nga dili mabanggaan sa mga dagkong sakyanan.

Apan duna usay mga bikers nga gahi pud og ulo nga badlongon kay dili man mosubay sa bike lane.

Gani sa Mandaue City bisan naa nay mga ali o bollard apan dili gyud mosubay bisan bosinahan na magpatuyang gihapon.

Ang uban dili man gani motahod sa stop signal nga mopatoratoy gihapon sa pagpadagan nga makaamong nalang sa uban.

Ako mismo hapit makadasmag kay go signal sa akong lane apan ang biker milabang gyud, murag exempted man sila sa lagda sa trapiko.

Bitaw ma-biker man o upat ang ligid magrespetohay lang gyud aron hapsay ug luwas ang tanan.