Makumbinser kaha ni Garcia si Duterte

Magkita karong adlawa silang Presidente Rodrigo Duterte ug Cebu Governor Gwendolyn Garcia didto sa Malakanyang kabahin niining dakong kontrobersiya sa mga adlaw sa kwarantina sa mga overseas Filipino workers (OFWs) ug returning overseas Filipinos (ROFs).

Sa maong meeting, ipresentar kuno ni Garcia ngadto kang Duterte ang rason nganong iyang gipamub-an ang mga adlaw sa quarantine sa pag-abot sa mga Sugboanong OFWs ug ROFs sa Mactan Cebu International Airport.

Ang maong desisyon sukwahi sa naunang guidelines sa Inter-Agency Task Force nga nagmando og taas nga mga adlaw sa quarantine sa mga OFWs ug ROFs sa gihingusgan nga kampanya sa kagamhanan batok sa coronavirus disease o COVID-19.

Daghan ang nagtuo nga kini usab ang hinungdan ngano nga gi-divert sa national government ngadto sa kaulohan ang mga flight nga motugpa unta sa MCIA nga naghatag lamang og kahasol sa umuliay nga mga Sugboanon.

Hinuon duha lamang ka scenario ang akong nakita niining maong meeting tali ni Duterte ug Garcia karong adlawa: either moyukbo ang presidente sa desisyon sa gobernador o modapig sa nauna nang kamandoan sa task force.

Modapig ka ha ang presidente sa desisyon sa IATF? Hinuon, alang kanako ug sa ubang obserber, expected kana tungod kay mao man kana ang national policy nga angay sundon sa tanang local government units tibuok nasud.

Kon pilion ni Duterte nga mosuporta sa argumento ni Garcia ug himoon nga exempted ang mga Sugboanon sa national guidelines sa IATF, dili ba kaha daghang probinsiya ang motiyabaw niini nga mora’g naay pinalabi ang presidente?

Tuyo lamang ni Garcia nga maka-save ang kagamhanan og milyones ug nga maputol ang kahasol sa mga Sugboanong OFWs ug ROFs sa iyang desisyon pagpamubo sa mga adlaw sa quarantine.

Apan makumbinser kaha niya ang presidente? Atong atangan karong adlawa.