Mas gikinahanglan sa Sugbo

Kong katakos ang hisgotan dili magpaulahi ang labing unang babaye nga gobernador sa lalawigan sa Sugbo nga walay lalis angayan gyud nga mahatagan og pwesto sa Senado kay napamatud-an naman ang iyang kalantip ug abilidad gikan sa pagkompleto niya sa iyang termino kaniadto isip gobernador sa probinsya hangtod nabalik sa pwesto.

Apil usab ang iyang paglingkod isip representante sa 3rd district sa Kongreso kinsa nahimo siya kaniadto nga House Deputy Speaker. Kini pa lang sobra pa sa qualified si Garcia nga magpapili nga senador. Kini seguro ang nakita sa ubang mga grupo nga mihimo og kasikas aron siya awhagon nga mohupot sa nasudnong pwesto didto sa Senado. Kong pwede pa lang mas taas nga position, ngano gud nga dili nga naa man sad siyay ikabuga sa natad sa public service nga dili lang pang camera.

Apan taliwala pa man niini, hugot na ang baroganan ni Garcia nga dili siya magpapili pagkasenador inay magpasubli siya sa kasamtangan nga pwestong gihuptan.

Para nako mas maayo ang desisyon ni Governor Garcia nga ipadayon ang kalamboan nga iyang nasugdan ngadto sa mga Sugboanon, proven and tested na ilabi na sa iyang mga pamaagi sa pagsugod sa pandemiya. Gipakita niya ang mga pamaagi aron makalikay dili lang sa coronavirus kon dili apil na ang kagaw sa kalisdanan diin sa sinugdanan pa lang gipatuman niya ang mga protocol nga mao gani gisunod sa kaulohan dihang mao pay pagbuto sa isyu sa coronavirus. Unang mihigpit ang lalawigan sa tinguha nga mapanalipdan gikan sa pagsulod sa virus.

Apan human mahiagom og kalisdanan ang mga Sugboanon tungod sa higpit nga protocol, gihinayhinayan ni Garcia pagbanhaw ang ekonomiya lakip na ang turismo, apan gipaagi sa konsultasyon sa ubang mga stakeholders ug nilampos kay nakabangon bangon naman ang mga tawo.

Nahimo kining posible human giuna pagwagtang ang pandemic fear nga maoy nigapos kanato nga gani hangtod karon maoy nigapos sa ubang mga rehiyon.

Gibarogan niini ang prinsipyo nga pagsalbar sa mga Sugboanon gikan sa mas grabe pa nga problema sa kalisod kong padayon nga mag-inistrikto. Busa ang lalawigan sa Sugbo ang posibleng gikasuyaan sa uban kay nakahimo man kita sa pagpaubos sa COVID-19 ug sa samang higayon gipagaan ang atong gibati nga kalisod tungod kay nawagtang ang kahadlok.

Ang ingon niini nga katakos sa usa ka lider angayan gyud nga pang national, apan mas gikinahanglan si Governor Garcia sa mga Sugboanon. Ipahuman nalang ang iyang termino o ang suliran sa pandemya ayha siya moserbisyo sa nasodnon nga kapasidad.