Ang importante mabakunahan

Sa dihang ang Sinovac ug AstraZenica vaccine pa ang nangabot daw pugsonon pa kaayo ang mga tawo sa pagpabakuna.

Gani gikinahanglan pa nga mangamuyo ang gobiyerno sa mga priority sector aron mabakunahan. Apan walay epek kay nagpasulabi gyud ang kahadlok ug kabalaka sa mamahimong epekto sa bakuna.

Milabay na ang taastaas nga panahon wala may natala nga grabeng epekto ang mga bakuna diin ang naandan ra nga pagpanakit sa parte sa lawaa nga gitusokan sa dagum.

Nag-inanay na nga nakombinse ang mga tawo ilabi na ang mga tiguwang nga magpabakuna.

Seguro napul-an na ang mga tiguwang sa pagpuyo sa balay sa kapin usa ka tuig maong nisugot na silang mabakunahan.

Samot nga midagsa ang mga tawo sa mga vaccination site dihang niabot sa nasud ang Pfizer vaccine kay blockbuster ang linya ilabi na didto sa kaulohan.

Nalimtan nga naa pa kita sa pandemic kay ang social distancing wala na masunod, hinuon dinhi sa Sugbo normal ra man ang Pfizer vaccine rollout kay nagpatuman man og epektibong systema.

Sa Cebu City kadtong mga tawo lang nga naay online registration ang makaadto sa mga vaccine site, bawal ang walk in o pag-adto sa vaccine site nga wala marehistro.

Random ang pagpili nila sa mga bakunahan nga sa pagrehistro pa lang makadawat og text ang vaccinee unsang adlawa ug oras, asa dapita ug unsa nga bakuna ang gamiton.

Sa atoa pa, sa balay pa lang daan masayran nang daan unsa nga bakuna ang itusok, dili na kinahanglan nga magpunsisok sa mga dapit kong asa ang gipili nga bakuna.

Tinuod man nga dunay katungod ang modawat sa bakuna sa brand nga iyang gusto. Apan kong paundayonan kini aw ang tanan didto nalang sa gipili nga brand.

Limitado pa man kaayo ang Pfizer vaccine busa dili nalang seguro magbuot kong unsa ang gamiton, ang importante mabakunahan.

Duha lang ang kapilian karon, magpabakuna o dili magpabakuna kong ugaling mopili man sa gustong brand.

Sa higayon nga makadawat og text sa brand sa bakuna kong dili gusto dili nalang maghago pa nga moadto sa vaccine site. Ana lang ka simple.

Makaingon ko nga epektibo ang gipatuman nga sistema sa Cebu City nga mahimo ra gyud sundogon sa ubang LGU.

Dili na kinahanglan nga isekreto unsa nga bakuna kay sa pagrehistro pa lang daan masayran naman kay sa makaadto na sa vaccine site ayha pa masayran unsa ang bakuna nga gamiton.