Noah mosirado man apan...

Officially signing off na ang Noah Complex sa dakbayan sa Sugbo karong kataposan sa Mayo human nahuman ang kontrata sa dakbayan sa Sugbo ug sa pribadong kompaniya nga mipagamit sa pasilidad aron himoong isolation facility sa mga nagpositibo sa coronavirus diseases COVID-19.

Sa gipahigayong presscon kagahapong adlawa, emotional ang mga nagdumala sa pasilidad nga pinangulohan ni Atty. Jocelyn Pisquera ug Konsehal Dondon Honteveros kauban si Vice Mayor Mike Rama nga maoy chairman sa Committee on Health sa Konseho sa dakbayan. Gibalik tan-aw nila kong unsa ka dako ang natabang nga serbisyo sa Noah Complex gikan sa pagkahimugso sa konsepto hangtod nga nahimong realidad ug nakadawat na og mga pasyente.

Dili lang yano nga isolation facility ang Noah Complex kay nahimo kining paanakan sa mga inahan nga nagpositibo sa virus nga nakaserbisyo dili lang sa mga molupyo sa dakbayan sa Sugbo kon dili lakip na sa ubang mga dapit. Giisip kini sa Department of Health nga gamay’ng hospital tungod sa katakos nga gipakita sa mga medical frontliners ngadto sa mga pasyente nga miabot og kapin sa tres mil ka mga pasyente ang ilang natabangan.

Admitido hinuon sila nga adunay mga kakuwangan ang pasilidad nga gireklamo sa pipila. Apan mas dako og natabang nga matud sa mga nagdumala nga maoy wala makita sa tawo kinsa kutob lang sa pagpanaway. Anugon kaayo kong masirad-an sa dayon ang Noah Complex nga dakong tabang niining panahona nga kasamtangang nakigkombate kita sa COVID-19 ug wala pa gani masayri kanus-a mahuman ug kong si kinsa ang makadaug. Apan unsaon man nga aduna may kontrata nga kinahanglang sundon kay kong ang mga tagdumala pa ang pagbut-on magpadayon ang ilang serbisyo.

Dili naman mapugngan pa ang pagtak-op sa Noah Complex apan dunay gamay’ng kahayag nga nagpaabot kay karon pa lang nakig negosasyon ang dakbayan sa tag-iya sa edipisyo nga kong mahimo himoon kining vaccination site.

Tungod sa kadako ug kaluag sa dapit seguradong makadawat kini sa mas daghang mga tawo aron mas paspas na unya ang pag irog sa vaccination rollout sa dakbayan aron usab makab-ot na ang gitinguhang herd immunity.

Maayo unta kong mosugot ang tag-iya sa kompaniya.  Pero masaligon man si Rama sa iyang plano sama kaniadto nga wala pa matukod ang Noah Complex duna kunoy nikwestyon apan namatod-an nga nakaserbisyo kini og dako sa katawhan nga maoy ilang gipasigarbo, Sa ingon niini nga programa, ang mga lider sa LGU nagkahiusa sa tumong ug tuyo nga mao ang pagserbisyo sa mga tawo.