Abiba ug ulog-ulog

Nagpalaban si Pesidente Rodrigo Duterte ni kanhi senate president Juan Ponce Enrile human makaangkon og grabing pagsaway tungod sa iyang pagpakaminus sa kadaugan sa Pilipinas batok sa China atubangan sa international arbitral tribunal.

Atol sa iyang pagpakighinabi sa katawhan pinaagi sa telebisyon niadtong Lunes sa gabii, giimbitar ni Duterte si Enrile aron hisgotan ang isyu sa West Philippine Sea.

Nangayo si Duterte og tambag gikan ni Enrile unsay maayong buhaton taliwa sa kontrobersiya.

Ug inay paminawon ang sentimento sa publiko nga barugan ang katungod sa nasud, mas gipili sa presidente nga paminawon ang mga ulog-ulog ni Enrile.

Human sa ilang panagtagbo, gideklarar ni Duterte nga dili na siya maminaw ni bisan kinsa mahitungod sa isyu sa West Philippine Sea tungod kay alang niya ang tambag ni Enrile nga dili awayon ang China maoy labing intelihente nga tambag nga iyang nadawat.

Gimando dayon ni Duterte sa tanang miyembro sa iyang gabinete nga dili na moluwat og bisan unsang pamahayag mahitungod sa kontrobersiya.

Nibilib kaayo si Duterte sa ulog-ulog ni Enrile niya tungod kay sukad sa sinugdanan ang tanang pulong nga gilitok niini pulos pagdayeg ug abiba kaniya. Nindot tinuod paminawon ang mga abiba bisan kun kini klarong ulog-ulog.

Apan angayang hinumduman sa presidente nga dili personal niyang ego ang nakataya niini kun dili interest sa nasud ug sa kapin 100 milyones ka mga Pilipino.

Hinaut mas maampingon ang presidente kinsay iyang paminawon mahitungod sa isyu. Ang mga tawo nga way personal nga interest ug agenda ug way mantsa ang kridibilidad maoy angay'ng pamation sa presidente.

Ug si Enrile wala malakip sa listahan sa mga ligdong ug way personal interest. Siguradong motila siya ni Duterte alang sa personal niyang proteksiyon labi pa nga duna pay kaso nga nag-ung-ong batok niya.

Sayon rang masayran kridible ba si Enrile o dili. Atong lingion ang una niyang mga baruganan mahitungod sa isyu. Niadtong 2012 si Enrile usa sab sa mga miabiba ni kanhi presidente Nonoy Aquino og nangugat nga kinahanglang barogan sa Pilipinas ang katungod niini batok sa China. Nganong takwahaw nausab iyang baruganan?

Ang kasaysayan abunda sa mga leksiyon nga mamahimong gabayan ni Duterte sa pag-umol sa iyang mga desisyon maylabot sa interest sa nasud. Usa sa mga angayang panaminan sa presidente mao ang nahitabo kaniadto ni haring Jeroboam sa Israel.

Tungod sa sayop nga mga tambag nga iyang gipaminaw inay nga dunggon ang yangongo ug sentimento sa iyang katawhan, natunga ug nabahin ang ginharian sa Israel atong sa iyang panahon.