Walay Pilipino nga senador

Nadismaya ang mga senador sa sugyot nga limitahan ang gastohon sa mga kandidato sa panahon sa pagpangampanya kay sama ra kuno nga gibutangan ug “price tag” ang mga kandidato ug ang makapabor niini mao lamang kadtong mga kwartahan. Daw nagbuwa sa tumang kaipokrito ang bâbâ sa mga senador ni’ng maong hisgutanan. Sa panahon sa eleksiyon, ang botante sama ra sa baboy nga magsunod-sunod gayod sa tawo nga nagdala sa lamawan, bisan ihawon pa sila samtang o human masabwag ang lawog.  Matud pa sa akong higala, “Adunay Liberal nga Senador, adunay PDP-Laban ug uban pa’ng partido nga senador, apan walay Pilipino nga Senador.” Subô palandongon!

Naghinobra’ng kabalaka

Gikabalak-an nga mas malisod ang umaabot tungod sa pagtumaw sa mga bag-ong COVID-19 variants gikan sa laing nasud. Agi’g pagpangandam, naghunahuna ang kagamhanan sa pagpamaligya’g mga kabtangan aron makatigum og pundo pagbatok sa umaaabot nga krisis. Nagtuo gihapon ang kagamhanan nga dugang kwarta ang tubag sa pandemiya. Ang kinabag-an sa katawhan maoy labing naapektohan, dili sa COVID-19 kon dili sa ilang panginabuhian. Ang tumang kabalaka wala maghikling sa mga kagul-anan sa atong umaabot; hinonoa naghabwa kini sa kusog ug kadasig sa atong karon. Change strategy na!

Dakop-dakop lang una

Miprotesta ang Pilipinas sa giingong fishing ban policy nga giimponer sa China diha sa kadagatan sa West Philippine Sea.  Matud sa DFA walay basehan ang maong fishing ban. Kutob ra sa pagarpar ang atong mga opisyales kay padayon’g nagpaka-bungol ang China. Bisan sa maong pagprotesta, sayod kita nga ang atong mga mananagat padayon’g gihikawan sa katungod pagpanagat. Miyentras tanto, duwa-duwa lang una’g tubig-tubig ug dakop-dakop ang atong mga mananagat batok sa coast guard/navy sa China.  Maypa’g moligeeed!

Dili negosyante

Gipanghimakak sa Philippine Red Cross ang taho nga namaligya kini’g mga bakuna batok COVID-19.  Gitataw sa PRC nga andam sila mohatag sa bakuna kon mobayad ang hingtungdan sa kantidad sa bakuna nga may patong nga administration cost. Dugang pa sa PRC, usa sila ka humanitarian organization og dili mga negosyante’g bakuna. Duwa ra sa pulong ang maong pamahayag sa PRC.  Wala sila mamaligya apan adunay bayad ang ilang pagpamakuna. Sakto hinoon ang PRC sa pag-ingon nga dili negosyante ang organisasyon kay basin ang mga tawo ra nga nagdumala niini maoy negosyante. Paleho la!

Likayan ang karne

Ang Department of Agriculture-Central Visayas miawhag sa mga beterinaryo ug ubang stakeholders sa pagseguro nga magpabilin ang Rehiyon 7 nga luwas sa African Swine Fever (ASF).  Sayo nga pagkamatikod ingon man dali nga pag-atiman sa mga kaso sa ASF maoy angayan nga buhaton. Sa pagbatok sa COVID-19, atong giawhag ang katawhan nga likayan ang pagkuyanap sa virus. Sa pagbatok sa ASF, mahimo ba’ng moingon kita nga likayan usab ang karne’ng baboy?  Kon ugaling tumanon, daghang piyesta ug selebrasyon ang mapurnada!  Madahaaan!