EDITORYAL - Dakmain ang vandals

Maraming vandals sa Metro Manila. Sila yung mga sumisira at pumipinsala sa pag-aari ng pamahalaan o maski sa mga pribado man. Karaniwang ginagawa ng vandals ay ang pagsusulat sa mga pader, footbridge, underpass o maski sa mga abandonadong bahay. Kung anu-ano ang mga nakasulat na ang iba ay hindi mawawaan o maintindihan. Halatang sinadya ang ginawang pagsusulat sapagkat spraypaint ang ginamit na kadalasang itim o pula. At hindi lang basta maliliit na letra ang pagkakasulat sa mga pader halimbawa. Nagdudumilat ang pagkakasulat na para bang ipinakikilala o iniaanunsiyo ang sinulat. Dahil sa gawaing ito, naging marusing ang pader, footbridge, waiting shed, haligi at iba pa.

Pero ngayon, hindi lamang sa pader at mga footbridge naka-concentrate ang vandals kundi pati na rin sa Metro Rail Transit. Nakakita sila ng magandang pagsusulatan at marahil nagkaroon ng deya ang vandals na kung sa MRT sila mag-ooperate, laging makikita ang kanilang sinulat. Roving. Masisiyahan sila sapagkat pabalik-balik ang MRT na sinulatan.

Ganyan ang nangyari sa isang tren ng MRT-3 na nadiskubreng sinulatan sa kaliwang bahagi nito. Gulat na gulat ang driver ng train nang makitang may malaking sulat na “CRANKS” ang train. Nadiskubre ang pag-vandalized sa train nang lumabas ito sa Santolan Station noong Miyerkules ng gabi. Ayon sa report, maaaring ang pag-vandalized sa train ay naganap sa pagitan ng Taft Avenue at Magallanes Stations. Nakapasok umano ang mga vandals sa sinirang bakod ng MRT.

Ilang taon na ang nakararaan, pinagsusulatan    din ng vandals ang underpass sa tapat ng Manila City Hall. Galit na galit si Manila Mayor Isko Moreno sapagkat kasalukuyan noong ipinaaayos ang underpass. Sinulatan ang mga bagong pinturang pader.

Ayon sa report, karamihan umano sa mga nagsusulat sa pader, footbridge, waiting shed ay mga bagong miyembro ng fraternity at ang pagsusulat ay bahagi ng initiation. Bago matanggap sa samahan, kailangan ay mayroon silang sirain o pinsalain.

Maraming nagba-vandalized pero nakapagtataka na wala halos nahuhuli sa mga ito. Maaaring ginagawa ang pag-vandalized sa kalaliman ng gabi. Dapat paigtingin ng mga awtoridad ang pagroronda para madakma ang mga sumisira at pumipinsala sa ari-arian. Nararapat mabigyan sila ng leksiyon at matigil na ang ganitong gawain.