EDITORYAL - Corrective ug dili punitive nga disiplina

Unsa may kapuslanan sa pag-estrikto kabahin sa hustong pagsuot ug pagsuot kanunay og facemask diha sa publikong lugar kun ang dad-an sa mga health protocol violators nga prisohan wala magsuot og facemask ang mga kaubang dinakpan?

Nagdasok ang mga prisohan karon ug kun pun-an pa unya aning mga ginagmay nga nakalapas sa health protocols mosamot og kahuot ug mas modako ang peligrong magkatinakdanay ug magkapandemiya sa sud sa mga police stations. Butang nga maoy gilikayan aning hustong pagpasuot ug kanunay nga pagsuot og facemask. Kung sundon ang kamandoan ni Duterte nga pahugtan ang pagpatuman niini, dili na tingali kinahanglang ipapriso pa.

Ang pagpahamtang og multa ug community service sama sa gihimo sa Cebu City karon paigo na. Ang kinahanglan lamang mao ang seryosong pagbantay ug pagpatuman niini diha sa kadalanan ug sa kabarangayan.

Epektibo man ang gibuhat sa Cebu City nga pagsikop, pagpamulta ug pagpaserbisyo sa mga malapason tungod kay makita kini sa gidaghanon karon sa mga natalang kaso sa COVID-19 sa nakalabay nga mga buwan.

Base sa uwahing report mikubos og maayo ang positivity rate sa siyudad hinungdan nga bisan ang mga giandam nga higdaanan para tagana sa mga pasyenteng dunay COVID-19 diha sa 15 ka mga tambalanang pangpubliko ug pribado sa dakbayan wala mameligro.

Dili na kinahanglang moabot pa sa psikalya o sa korte kining simpleng kaso sa paglapas sa pagsuot og facemask.  Ang angay “corrective” ug dili “punitive” nga pamaagi ang pagdisiplina.

Gawas nga hasol parehas sa mga midakop ug sa dinakpan magdugang lang kini sa nagtipun-og nga mga kaso diha sa hukmanan ug piskalya. Usa pa, sagad sa mga nakalapas niini mao kadtong mga walay trabaho ug kadtong gagmay’ng mga mamumuo. Kun sila prisuhon makaluluoy ang ilang pamilya.

Kinahanglan lamang gyud nga estriktuhon sa mga local government units ang pagpasunod sa mga health protocols ug kini buhaton 24/7. Ug tinud-on usab ang pagpamulta ug community service niadtong mga malapason.

Mas maayo gani nga kining mga mag-community service patamnon og mga kahoy gawas anang mga cleanup drives bulahan nalang nga bisan sa ilang kasaypanan duna silay natampong maayo sa katilingban.