Kinsa ang mabasol

Makadaghan gibalikbalik ni Presidente Rodrigo Roa Duterte ang pagbasol kang kanhi Foreign Affairs Secretary Albert Del Rosario sa pag-okupar sa China sa Scarburough Shoal. Apan ang kanhi ambassador sa Amerika nga si Jose Cuisia Jr. miingon nga ang angayan nga basulon mao ang China ug dili si Del Rosario.

Giasoy ni Cuisia ang hitabo. Iyang giingon nga dihang nahitabo ang panagharong sa 77 ka mga higanting barko ug walo ka gagmay nga barkong iggugubat sa China ug Pilipinas, gisugyot sa Amerika pinaagi ni Assistant Secretary of State Kurt Campbel sa Pilipinas ang pagbiya sa Scarburough. Miuyon si Cuisia ubos sa kondisyon nga pabiyaon usab sa Amerika ang China sa dapit.

Si Ambassador Cuisia gipahibalo sa Amerika nga misugot ang China nga mobiya usab sa dapit. Tungod niini gipahibawo ni Cuisia si Secretary Albert Del Rosario nga mipahibawo usab ni Presidente Noynoy Aquino kinsa nagpanagana kay basin dili motuman ang China.

Pagka-Hunyo 15, 2012 mibiya ang walo ka barkong iggugubat sa Pilipinas sa Scarburough Shoal. Pila ka oras human mibiya ang mga barko sa Pilipinas mitawag si Secretary Del Rosarion kang Ambassador Cuisia ug nagpahibawo nga wala mamiya sa Scarburough ang 77 ka mga higanting barko sa China busa gipahibawo niini ang Amerika kinsa miingon nga hatagan lamang og panahon ang China. Miuyon si Cuisia ubos sa kondisyon nga mobiya gayod nianang adlawa ang mga barko sa China.

Pagkasunod adlaw gitawagan ni Cuisia ang Amerika ug gipugos sa pagpapahawa sa barko sa China sa Scarburough apan wala mogunok ang Amerika tungod kay niadtong panahona nanginahanglan usab ang Amerika sa suporta sa China sa ilang nuclear deal sa Iran.

Dugang pa ni Cuisia dili na usab puwede nga mapabalik sa Pilipinas ang iyang mga barkong iggugubat tungod kay nakaposisyon na sa dapit ang mga barko sa China.

Si Cuisia wala makasabot sa pagbasol ni Presidente Duterte kang Del Rosario. Matud niya nga kun may mabasol dili si Del Rosarion kondili ang China nga wala motuman sa kasabotan nga pagbiya sa Scarburough Shoal.

Kon ikaw ang pangutan-on, kinsa man ang mabasol?