Patas ba ang vaccine distribution?

Murag nahanaw naman seguro ang kahadlok sa mga tawo sa bakuna ilabi na sa mga senior citizens kay sa dakbayan sa Sugbo lang daan daghan naman ang nagpabakuna.

Gani niadtong Lunes lang mokabat seguro sa 200 ka mga senior citizens ang napalaw dihang wala mabakunahi pag adto sa mga vaccination sites.

Gumikan kay nahurot naman ang kadtong bakuna sa Sinovac nga gikan sa Department of Health ug gigamit sa Cebu City.

Matud sa pangulo sa COVID-19 Vaccine Board sa syudad nga si Dr. Jeffrey Ibones nga mas midaghan ang gustong mabakunahan tungod seguro kay nakita naman sa mga tawo nga luwas ra ang bakuna ug walay nangadaut human nabakunahan.

Gawas pa daghan na usab mga opisyal ang nagpabakuna lakip na si Mayor Edgardo Labella sa dakbayan sa Sugbo.

Nagpasabot nga wala na maproblema sa tinguha nga mabakunahan ang kinabag-an apil na ang mga tiguwang.

Apan kong unsa ka dasig na ang mga tawo sa pagpabakuna mahulog gihapon kini sa walay kapuslanan kay kuwang man ang supply sa bakuna.

Gustohon man sa mga lokal nga kagamhanan nga mapatuman ang vaccination rollout dili gihapon mahitabo kay magdepende man ang tanan sa pahat nga makuha.

Gani kadaghanan o adunay dakong bahin mao ang man ang kaulohan, ug ang mabilin maoy bahinon sa ubang mga dapit sa nasud.

Hinouon masabtan nato nga mas daghan ang kaso sa covid didto ilabi na ang NCR+ pero dili lang pud seguro palabihon sila kay sakop man usab sa Pilipinas ang ubang mga rehiyon.

Magsige man og pamantay sa mga adunahang nasud nga maoy nihakop sa mga bakuna sama sa Amerika. Apan dinhi sa atong nasud nahitabo usab diay nga ang imperial Manila man usab ang halod mohakop sa vaccine supply.

Unta patas ang distribution sa mga dapit, seguro dunay formula sila nga gisunod alang sa vaccine distribution.

Kadtong mga nag una sa listahan nga mabakunahan i-grab na ang opportunity kay hayahay gani kamo nga mauna sa pagbakuna unya ang uban magpalugit pa gyud.

Hala ayaw nalang mo pabakuna kay anaay daghang naglinya nga nagpaabot kanus-a ma schedule.

Sa pagkakaron, ang bakuna ra gyud ang lig-on nga pang alkontra sa virus nga dili kaayo makadulot sa mga tawong nabakunahan na.

Hinaut unta nga aduna nay daghang supply nga moabot ug dili pautay utay aron maangkon dayon ang gitinguha nga herd immunity.