Priso ang walay facemask

Gimando ni Presidente Rodrigo Roa Duterte ang pagdakop ug pagpriso sulod sa siyam ka oras sa mga tawo nga dili magtarong sa pagsulob sa ilang facemask. Nunot niini nakig-alayon na ang Department of Interior and Local Government ngadto sa kapolisan ug mga lokal nga kagamhanan aron ilang madeterminar ang mga sukaranan sa pagpatuman sa kamandoan ni Presidente Duterte.

Ang mga lokal nga kagamhanan may lainlain nga ordinansa nga nagpahamtang og lainlain nga silot sa mga kamandoan sa Inter-Agency Task Force on the Management of Emerging Infectious Diseases nga mao ang policy-making body ning panahon sa pandemiya. Mao kini ang rason nganong kinahanglan nga hiusahon ang mga ordinansa.

Sigun sa Article 125 sa Revised Penal Code, ang awtoridad kinahanglan nga mohatod sa tawo nga gipriso ngadto sa husgado alang sa pagpasaka og kaso sulod sa 12 oras niadtong krimin nga gagmay, 18 oras niadtong krimen nga ang silot correctional ug 36 oras niadtong ang silot afflictive.

Ang bagong hepe sa kapolisan sa nasud nga si Heneral Guillermo Eleazar mimando sa kapolisan nga manakop sa mga malapason sa quarantine protocols nga dili pasakitan ug silotan. Gipasalig ni Heneral Eleazar ngadto sa katawhan nga ilang respitohon ang tawhanong katungod sa mga malapason sa qurantine protocols.

Sakto ang mando ni Presidente Duterte nga pagpapriso sa mga tawo nga dili magtarong sa pagsulob sa ilang facemask. Dinhi maingon nato nga seryoso ang Presdente sa pagpatuman sa health protocols kay sayonan ba pod mo niana nga dakpon ug prisohon sulod sa siyam ka oras ang dili magtarong og sulob sa ilang facemask unsa pa kaha kadtong dili gayod magsulob?

Pero kinahanglan nga bantyan ang mga magpatuman sa kamandoan sa presidente aron malikayan ang abuso. Hinuon mihatag na og kaseguron si Heneral Eleazar mahitungod niini.

Sa mga tawo, kun mosunod naman lang gani ta sa health protocols kana pong nahasubay sa sakto.