Sikat kontra agi

Kon himoon ang piniliay o eleksiyon karon kinsa ang imong pilion, ang sikat o ang may agi na? Dili madugay adlaw na pod sa piniliay alang nasudnon ug lokal nga posisyon. Mabasa ug makita napud nato ang pangalan sa mga kandidato nga mangulitawo sa atong mga boto.

Gani misibaw ug nanggawas na usab ang survey sa mga survey agency nga gustong mopahibawo ngadto sa katawhan kinsa ang mga posibling magpapili sa umaabot nga piniliay ug usa na niini ang Pulse Asia.

Sa gipahigayon nga survey sa Pulse Asia niadtong Pebrero 22 hangtod Marso 3, 2021 migawas nga nag-una si Davao City Mayor Sara Duterte nga adunay (27%), kanhi Senador nga si Bongbong Marcos nga adunay (13%), Senador Grace Poe (12%), Manila City Mayor Isko Moreno (12%) ug Senador Manny Pacquiao nga adunay (11%).

Sa 12 ka mga posible nga mokandidato sa pagka bise presidente sa Mayo 2022 nga piniliay, nag-una si Mayor Isko Moreno nga nakakuha og (16%). Si Senador Manny Pacquiao (15%) ug Davao City Mayor Sara Duterte (15%) ang nagtabla sa unang dapit.

Samtang nahimutang sa ikatulo nga dapit si Senate President Vicente Sotto III nga adunay (11%). Siya gisundan ni Senador Bongbong Marcos (11%) ug Senador Bong Go nga nakakuha og (9%).

Ang mga pangalan nga atong nahisgotan pulos sila inila samtang ang uban dili lang inila kondili may agi pa. Sama pananglit ni Senate President Vicente Sotto III nga alagad na sa  gobiyerno sulod na sa 25 ka tuig gikan sa pagka bise mayor hangtod nga nahimong senador diin siya ang nahimong utok sa pagkatukod sa Philippine Drug Enforcement Agency (PDEA) ug usa sa amahan sa Comprehensive Dangerous Drugs Act of 2002.

Si Sotto mao usab ang amahan sa Absentee Voting Law, Bayanihan 1 and 2 nga naghatag og ayuda sa mga naapektohan sa COVID-19 pandemic. Siya usab ang nagduso ang Medical Scholarship Act nga maghatag og tabang financial niadtong gustong mag doktor.

Balik ta sa akong pangutana, kun himuon ang eleksiyon karon kinsa man ang imong pilion, ang sikat o ang may agi?