DOH allergic sa transparency
Kapin na sa tuig human nagsugod ang pandemya sa COVID-19, wa pa gihapon mahapsay ni mapasabot sa Department of Health (DOH) ang makalibog nilang mga numero nga gipagawas kada adlaw. Pananglitan, wa gihapon magkatakdo ang mga numero sa local government units (LGUs) ug DOH. Managlahi man gani ang mga numero sa rehiyonal ug nasudnong DOH.
Niangkon na ang nasudnong DOH nga bahaw ang ilang mga numero og labing menos duha ka adlaw. Ang DOH Central Visayas wa magtagad sa pagpahibawo pila ka adlaw sila nga uwahi kon ikumparar sa LGUs.
* * *
Aron paglikay sa kalibog, kasagaran sa LGUs nihunong paghatag sa inadlaw nilang mga numero sa bag-ong mga kaso sa COVID-19. Sa way paghunahuna nga ang pagtago sa kasayuran mahimong moresulta sa wa kinahanglana nga mga huhungihong nga may mga pakapin nga di mao.
Wa makatabang nga pipila sa wa mohatag og inadlawng mga numero, sama sa Cebu City Emergency Operations Center, magsige og pahibawo nga bahaw ang mga numero sa DOH, mas ubos ang aktuwal nilang mga kaso ug kausa ra kada semana ang paghapsay sa nagkasungi nilang mga numero.
* * *
Laing sakit sa DOH, nga wa pa gyod matambali hangtod karon, mao ang grabeng allergy sa katin-awan. Bukid sa ilang buot ang paghimo sa labing yano nga pagpasabot sa kahibudngan nilang kasayuran.
Pananglitan, nipahibawo ang DOH 7 og 27 ra ka bag-ong kaso niadtong Lunes, Mayo 3. Pero wa ipasabot nganong pito ra sa 14 ka laboratoryo ang nakahimo og swab tests. Naguba ba, gitapolan ba lang ang medical technologists, o wa lang ipha aron mogamay ang mga kaso?
* * *
Makapahibung sab ngano nga human sa pila ka adlaw nga ang Bohol, nga maoy kinadaghanan og bag-ong kaso sa tibuok rehiyon, nikalit lang ka-zero niadtong Mayo 4, Martes.
Sama sa naandan, wa magtagad pagpasabot ang DOH nganong wa ka-report nila ang duha ka laboratoryo sa Bohol, ang Gov. Celestino Gallares Memorial Hospital ug Bohol Containerized PCR Laboratory. Nadaot ba ang kahimanan maong wa kahimo og swab tests? O may swab tests pero wa lang mapadangat ang mga resulta? O gihunong una pag-ihap aron mahupay ang kabalaka sa mga Bol-anon sa pagsulbong sa ilang mga kaso?
* * *
- Latest
