Nabitik sa kaugalingong bakak
Mamalikas ug magbinastos na lang si Presidente Rodrigo Duterte kay wa na tingali mapuslanon nga masulti human nabisto nga pulos sayop ang iyang mga panagang nganong gipasagdan ang pagpanghasi sa China sa West Philippine Sea (WPS).
Daghang salamat sa kalantip nilang retired Supreme Court Senior Associate Justice Antonio Carpio ug kanhi Foreign Affairs Secretary Albert del Rosario, napamatud-an nga pataka lang ang sulti sa presidente nga giokupahan na sa China ang WPS ug moresulta sa gubat ang pagpapahawa sa China.
* * *
Gawas sa pagpasabot ni Carpio sa makasaysayanong kadaugan sa Pilipinas batok sa pag-angkon sa China sa WPS, nga mapatuman unta kon nidangop ang pamunoan ni Presidente Duterte sa United Nations ug nakig-alyansa pa sa ubang kanasuran inay sa pagtila sa lapalapa ni Presidente Xi Jinping sa China, ang uwahing mga panghitabo nimatuod nga di na mapapahawa ang China.
Labing bantang nga ebidensiya nga sayop ang gipatuo sa presidente mao ang pagpahawa sa gatosan ka Chinese maritime militia boats gikan sa Julian Felipe Reef sa WPS dihang niabot ang USS Theodore Roosevelt ug ubang mga barko sa gubat sa Estados Unidos.
* * *
Nihungaw sa samang higayon ang pasidaan ni Presidente Duterte sa gubat: Inay mosukol, nibahag ang ikog sa China nga nikatag sa nagtapok nilang mga barko atubangan sa mas modernong puwersa sa mga Amerikanhon. Way kalainan sa ilang pagsibog dihang nisukol sa ilang panghasi ang Vietnam, Indonesia, Taiwan ug ubang kanasuran.
Kutob ra sab sa panginsulto ug panghudlat ang China human gipalayas nga may pakapin sang balikas nilang Foreign Affairs Secretary Teodoro Locsin ug Defense Secretary Delfin Lorenzana.
* * *
Labing lisod sa presidente ang pagpakita unsay iyang nahimo pagpanalipod sa WPS human nidaug ang pamunoan ni kanhi Presidente Noynoy Aquino, uban sa tabang nilang Carpio ug del Rosario, batok sa China.
Mas naapiki sa pagpasabot nganong mga Pilipinhon ang iyang gikontrahan pero nilingiw sa pagpangilog sa China sa kabahin sa atong nasudnong teritoryo.
Maong sama sa bugoy sa pikas eskina nga nabitik sa iyang kaugalingong utot maong nangalisbo ug nabisto nga wa diay tarung nga kabuot, gipasanginlan na lang niya silang Carpio ug del Rosario nga way mga itlog ug di tinuod nga Pilipino.
* * *
- Latest
