Bisan ang abortion dunay package deal

Nadakpan sa mga sakop sa National Bureau of Investigation-7 ang lima ka mga naglangkob sa grupo sa mga abortionist sa managlahing operasyon sa Barangay Mojon dakbayan sa Talisay ug sa  dalan A. Lopez dakbayan sa Sugbo.

Kini human naabot sa buhatan sa NBI ang modus sa grupo nga migamit pa sa social media sa paghaylo sa ilang mga prospect clients diin nagpaila nga usa ka Ob Gyn aron makaagni gyud og mga kliyente.

Adunay sistema nga gihimo sa grupo diin planado ang tanan aron seguradong makabingwit sila ug sa ingon lisod dakpon sa mga otoridad apan sila hinuon ang nabingwit.

Ang mga kliyente nga mabingwit mopadala og mensahe sa social media ug  kong magkasabot dunay usa ka babaye nga sinaligan sa grupo nga maoy motagbo sa kliyente nga mao usay modala niini ngadto sa balay sa abortionist.

Dunay package nga pagapilian, ang mahalon nga tag P30 mil diin mogamit og mga equipment sa paglaglag sa bata sa sulod sa sabakan samtang aduna usay baratohon nga tag P9,500 (mahal gihapon) diin pildoras lang ang gamiton aron makuha ang gisabak sa babaye.

Migamit ang NBI sa usa ka babayeng ahente nga tinuod gyud mabdos aron madakpan ang mga suspek ug sa dihang himoon na unta ang abortion didto na gidakop ang mga nalambigit sa krimen.

Patay sa llimod ang mga dinakpan nga wala kuno sila mobuhat sa krimen.

Apan lig-on ang ebidensya sa NBI diin nakuha ang mga binayloay sa mensahe sa mga dinakpan, anaa usab ang mga cellphone diin naka save ang tanang kamatuoran nga magamit sa pagtaral kanila sa hukmanan.

Pastilan kon dili pa lang sala kaayo gyud nga pangtusokon gamit ang dakong heringgilya ang mga walay puangkod nga kriminal sa kinabuhi nga anaa pa sa sakbakan sa inahan.

Kining mga tawhana buhi pa apan gisunog na ang kalag didto sa impiyerno tungod sa ilang paghunos sa kinabuhi sa usa ka anghel, makagawas ra gihapon sila bisan kapila pa madakpan kay bailable man ang kaso.

Pila pa ka kinabuhi sa bata ang ilang makutlo, gani naniguwang nalang sila sa ilang trabaho maong dili na dutlan og konsensya.

Kong duna may mga mas tampalasan, kadtong mga inahan o mga tawo nga modangop sa mga aborsiyonista aron laglagon ang kaugalingong dugo nga migitig sa ilang sabakan.

Maayo lang silang magpalami apan kong magbunga na dili na makasugakod hangtod patyon nalang ang kinabuhi sa inosenting anghel.

Kining mga ginikanan nga maghimo ani walay kapasayloan nga madawat.

Walay mapili sa mga mangungumot ug nagpakumot, silang tanan parehong dautan nga angayang silotan. Bisan moingon ang uban nga choice sa inahan kon idayon o dili ang paghimugso sa bata.

Ngano man diay og ihimugso ug ipasagop kong dili makaya kay sa patyon, ipalabi lang gyud ang garbo o kauwaw? mas makauuwaw nga walay sama ang ingon niini nga krimen.