Gob. Gwen ayaw palingla

Taliwala sa pandemiya, imbes maoy mobaha ang mga bakuna batok COVID-19, mao hinuoy mibukal pag-ayo ang kainit sa politika.

Ultimo ang pagdagsang sa community pantries nga gipasiugdahan lamang sa usa ka yanong concerned citizen didto sa kaulohan, diin kalit lang gisundog sa mga nangatandog ug nanaghan, gipamolitka usab. Sa mga manggidudahong politiko, kining buhata gisaway, gilalisan ug gipanag-awayan.

Ambot, nganong ang maayong tumong, buhosan man gayod og hugaw’ng bulok aron kini mamaot? Mao baya kini ang normal nga kinaiya sa atong mga politiko (hinuon, di tanan). Ang puti takpag itom. Ang pagpamakak himoong hait hinigiban aron mahagba ang kaatbang.

Unya kugihan mangahoy’g mga isyu nga ilang isugnod ngadto sa dughan sa politikong ilang duolon ug atikon.

Niining bag-o may multi-sectoral group nga gustong palansaron sa pagka-senador si Cebu Gov. Gwen Garcia inig ka 2022 National Elections.

Kay kuno, wala nay pure Cebuano didto sa Senado. Pagkamabaw nga rason.

Paglingkod man ugod og balik ni Gob. Gwen sa Kapitolyo, nagpungasi dayon ang pagpatuman sa daghang proyekto.

Sa pakiggubat sa tibuok kalibotan ning makalilisang pandemiya, siya ang matang sa gobernador nga isog kaayong nakigkombati nga kinahanglang ablihan gyod ang mga patigayon aron malikayan ang hingpit pagkamatay sa atong nagkamang nang ekonomiya.

Sa laktod, wala malilong sa katawhan ang pagkamanggihunahunaon niyang inahan sa tibuok lalawigan sa Sugbo.

Ang iyang pagka-workaholic, pagka-positive thinker, pagka-pandemic fighter ug ang kakugihan mangitag paagi aron dili mahutdag pundo ang panudlanan sa gobiyerno, maoy nakapahimo sa Sugbo nga kinadatoan sa tanang lalawigan sa Pilipinas. Unya, nganong tinguhaon man ang pagputol sa iyang maanindot nga performance ug adto ibalhin sa balwarteng diyotay ray nakaila niya?

Hinuon, iyang giklaro nga dili siya interesado sa Senado. Gusto pa siyang mag-gobernador sa umaabot eleksiyon. Gusto pa niyang ipadayon ang matang sa serbisyong makabulahan sa mga Sugboanon. Diin, kon mahanaw na si COVID-19, kon unsa man ang para sa katawhan nga giguba niini, paningkamotan niya nga mapahiuli.

Husto kaayo ang nakab-ot mong hukom, Gob. Gwen. sa Senado? Dili pa panahon. Ang pag-endorso nimo sa maong mas taas nga position, sama ra nga gilabay ka ngadto sa layo. Dili kini binuhatan sa nagmahal kanimo. Busa, makapahibulong?