COVID-19 apocalypse

Mosaler kaha ang bakuna batok COVID-19?

Mao kini ang nagdumiraw nga pangutana sa mga tawo ilabi na kadtong nagduhaduha kong magpabakuna o dili gumikan sa kahadlok nga basin adunay motumaw nga epekto sa umaabot.

Gitubag na kini sa makadaghang higayon sa mga experto sa panglawas nga dako kaayo og ikatabang ang bakuna.

Dili man hinuon kini makapakgang sa virus sa pagtapot sa mga tawo nga nabakunahan na apan makatabang kini sa pagpalig-on sa lawas nga dili magrabehan ugaling mataptan sa virus nga dili na mahiadto sa hospital o sa mga critical care facility. Usa ka doktor sa India nga gi-interview sa usa ka international news network namahayag sa kamahinungdanon sa bakuna. Tungod kay kong wala pa kuni sila nabakunahan labi na ang iyang mga tiguwang nga ginikanan hayan apil na kuno sila sa gipang cremate tungod sa kadaghan sa mga nangamatay sa ilang nasod tungod sa COVID-19.

Matud niya tanan tawo sa ilang village ug sa ilang pinuy-anan natakboyan sa virus ug maayo nalang kay nakapabakuna na sila sa wala pa moigo ang second wave sa virus ug ang epekto nila ang flu-like symptom lang.

Gihulagway sa naasoy’ng doktora nga ang nahitabo sa ilang nasud susama sa apocalypse tungod sa hilabihan ka grabe sa kadaut nga namugna sa kinabuhi sa mga tawo.

Makita ang hulagway sa kamatayon nga nakamugna sa hilak ug danguyngoy sa mga namatyan. Makita ug mabatyagan ang kainit sa kalayo nga maoy gigamit sa pagdaub sa mga patayng lawas nga wala na maato sa crematorium tungod sa kadaghan sa namatay matag adlaw.

Sa sulod ug gawas sa  mga tambalanan makita ang mga pasyente nga daw naa na sa purgatoryo nga nag apas sa ilang gininhawa tungod sa kakuwang sa oxygen.

Nangong nahitabo man kini sa India? Matud pa nga subra na ka kompiyansa ang mga tawo ilabi na human nabakubahan nibalik na sa naandan nga dili na mag mask ug gitugotan na ang mga panagtapok sa daghang mga tawo.

Ang nahitabo sa India dili layo mahitabo usab sa atoa kon mokompiyansa. Busa karon pa lang magkat-on na ang tanan ug hinumduman kanunay ang mga basic health protocols aron kapanalipdan nato ang atong kinabuhi.