EDITORYAL - Way pinalabi

Seryoso ang gobiyerno sa pagpatuman sa minimum health protocols. Gani duna nay mga quarantine violators nga nangamatay sa mga kamot sa otoridad. Apan makasaway sab ang publiko tungod kay daw may pinili kung kinsay malapason o kinsay paundayonan lang.

Nabantayan kini sa pipila ka okasyon ug mga opisyal nga kalihokan sa mga lokal nga opisyales gobiyerno diin duna gyuy pipila nga dili magsuot og facemask atubangan sa ubang nanambong.

Apan sa Thailand, mismo ang gobernador sa Bangkok nga nga si Gov. Aswin Kwanmuang mipamulta og 6,000 Baht (P9mil) sa ilang Primero Ministro nga si Prayuth Chan-ocha tungod kay wa kini magsuot og facemask.

Sama sa Pilipinas higpit sab ang Thailand sa pagpatuman sa ilang minimum health protocols aron mapugngan ang pagkatap sa coronavirus.

Bisan kinsa pa ug kun unsa pa man ang posisyon, kinahanglang mosunod ang tanan sa health protocols. Mao sab unta kini buhaton sa tanang opisyales dinhi sa Pilipinas.

Ang pagsuot og facemask matag mogawas sa panimalay proteksyon dili lang para sa nagsuot kundili hasta usab sa mga tawong anaa sa iyang palibot.

Gawas pa niini, ang mga opisyales sa gobiyerno mao gyud untay ehemplo sa tanan kay sila maoy gitahasan sa nasudnong kagamhanan ipatuman ang mga health protocols.

Mao nga kung pugsanay ang pagpasuot og facemask sa tanan, mao sab unta para sa mga opisyales sa gobiyerno.  Way palabihon.

Angay hinumdoman nga duna nay mga opisyales sa gobiyerno nga nangamatay sa coronavirus, nagpasabot kini nga dili sila kublan.