Ayaw sagoli'g gasolina

Sumala sa pagtuon nga gihimo sa Budget Direct sa 165 ka nasud, nahimutang sa ika-52 nga pwesto ang Pilipinas nga adunay labing mahal nga presyo sa gasolina.  Sa punto sa “affordability,” nga gibase sa “ratio” sa average nga sweldo itandi sa presyo sa gasolina, anaa usab ang Pilipinas sa ika-49 nga pwesto (sa 152 ka nasud).   Makapahinumdum sa estorya sa naninda’g sud-an nga mirason sa kustomer nga ang pag-mahal sa iyang baligya’ng sud-an naggumikan sa pagsaka sa presyo sa gasolina. Busa gihangyo siya sa kustomer nga kon mahimo dili lang sagolan og gasolina ang sud-an aron dili momahal.  Pagkatoytoy!

Pulos paghot, way paak

Gipanghingusgan na sa China ang pagpangangkon sa mga isla ug kayutaan diha sa West Philippine Sea ug mibadlong pa kini sa Pilipinas sa paghunong sa mga kalihokan nga gipahigayon diha sa naasoy’ng kadagatan.   Gikondenar sa Senado, pinaagi sa pulong lamang, ang gibuhat sa China.  Agi’g tubag, gihinginlan sa China ang Pilipinas sa maong lugar.  Tataw nga dili madala’g hulga ang China. Tataw usab nga walay ikasarang ang Pilipinas kon ipaagi sa pwersa ang pakigbatok sa China.  Nahisama kita sa talawan nga iro nga kusog ra ang paghot apan walay paak.  Maypa’g moligeeed!

Dakpon kon motabang

Gikataho sa Bureau of Treasury nga mibukad na ang “budget deficit” sa atong nasud ngadto sa P321.5 billion sulod lamang sa first quarter karong tuiga tungod sa pagpunay og gasto sa pagtubag sa pandemiya luyo usab sa padayon nga pagkunhod sa kita ug koleksiyon sa kagamhanan.  Malisod na karon ang kahimtang sa gobyerno tungod sa kakulang sa pundo.  Apan matud pa lage sa akong higala sa Mindanao, dili lang sila motabang, kay kon tabangan kuno paghimo og kwarta, dakopon man pud sila.  Fishkots jud!

Dili haum nga training

Mipasidaan si Denmark Ambassador Gret Sillasen sa posibilidad nga dili na makasakay ang mga Pilipinong tripulante sa mga barko nga gipanag-iya ug gidumala sa Denmark kon ugaling mohukom ang European Maritime Safety Agency (EMSA) nga pakyas ang Pilipinas sa pagtuman sa 1978 Standards of Training, Certification and Watch-keeping (STCW) Convention.  Dakong tampaling sa MARINA kining maong pamahayag.  Kon dili ipahaum sa MARINA ang mga gipahigayon nga trainings sa panginahanglan sa EMSA, nahisama ra ang MARINA sa ahente nga namaligya’g refrigerator didto sa North Pole.  Pag-chure uy!

Buta sa pagpakabanâ

Usa ka buta nga si Bonifacio Saliganan nga taga-Montalban, Rizal, midayo ngadto sa Quezon City aron pag-donate sa iyang natigom nga sabon-panglaba ngadto sa Maginhawa Community Pantry.  Nakakita si Bonifacio sa panginahanglan sa uban kay wala niya gamita ang iyang mga mata kon dili ang iyang kasingkasing.  Sagad kanato makakita man unta, apan buta man kita sa pagpakabanâ.  Matud pa sa linya sa awit, “Wala’y pulos ang talâ sa atong mga mga mata kon sa kasing-kasing magpabilin ‘tang BUTA”.  Fezteleern!