Joseph

Si Fr. Christopher Dave Cantillas nihatag usab sa iyang undanon kaayong pamalandong kalabot sa ngalang Joseph sa dihang siya ang nisaulog sa opening salvo mass.

Ang Joseph nagkahulogan man og:

- Just- kun tawo nga matarong. Motuman gyud sa balaod nga iya sa Dios ug nisubay sa dalan nga iya sa Dios.

- Obedient kun masinugtanon o matinumanon sa Balaod nga Diosnon nga tungod niini iyang gihiklin ang iyang kaugalingong baruganan kay lagi mas mahinungdanon alang kaniya ang balaod sa Dios. Gipangasawa niya si Maria ug iyang giampingan kini.

- Silent. Wala kaayo nato Makita nga dunay mga pulong nalibkas si Jose diha sa Balaang kasulatan. Apan wala kini magpasabot nga ang maong kahilom nagpadayag man og kahuyang. Nagpakahilom siya kay buot niyang mamahimong mapamalandungon sa kabubut-on sa Dios.

Nagpakahilom siya tungod kay siya maampoon man ug nangita sa Dios diha sa kahilom.

- Example kun sanglitanan alang natong tanan labina gyud sa mga amahan sanglitanan siya sa pagkamapaubsanong alagad ngadto sa tanan.

- Protector. Si Maria iyang gipanalipdan. Si Jesus iyang gipanalipdan.

Ang simbahan iyang gipanalipdan. Gani mokurog sa kalisang ang mga demonyo kun sangpiton nato ang ngalan ni Jose.

- Helper kon magtatabang. Walay makawang kon siya atong sangpiton sa panahon sa atong dakong panginahanglan.

Walay makawang kon siya atong hangyoon sa higayon nga kita anaa sa dakong kadaut. Ingon ana si San Jose.

Ug salamat sa Dios nga ako nakaalagad gyud sa parokya diin siya mao ang patron. Viva San Jose! Viva!