Pasagdi ang mga community pantry

Bisan unsaon nato og timbangtimbang, wala kitay nakitang sayop niining paglusad sa mga giingong community pantry nga unang nanguhong didto sa kaulohan ug misulbong usab dinhi sa Sugbo ug ubang mga lugar sa nasud.

Dako kini og ikatabang alang niadtong mga kabus kinsa naglisod pagkaon og katulo sa usa ka adlaw, ilabina niining pandemiya sa coronavirus disease o COVID-19 nga padayong miarangkada sa tibuok kalibotan.

Apan, sa laing bahin, dili na usab maayo kon sagolan og pamulitika ang pagkuyanap niining maong mga community pantry. Angay pa man gani kini nga i-encourage niining panahon sa tumang kalisdanan dala sa pandemiya.

Sa dihang gipahigayon ang unang community pantry didto sa Metro Manila, haskang dalia sa otoridad nga naka-red tag niini. Mialegar ang kapolisan nga adunay koneksiyon sa mga rebelde’ng komumista ang maong community pantry.

Gani, didto sa dakbayan sa Cagayan de Oro, nanira gayud ang usa ka community pantry dili pa lamang dugay gumikan sa giingon nga red-tagging ug ubang harassment nga naangkon kuno sa nag-organisar niini. Gisirhan ang maong community pantry duha lamang ka adlaw human kini ablihi.

Hasta ang politkanhong oposisyon dali usab nga nakasakay sa mga nanurok nga mga community pantry sa nasud ug dayong pahit sa administrasyon palpak kuno sa kampanya batok sa makamatay nga coronavirus disease.

Matud sa mga taga oposisyon, kining maong mga community pantry timailhan sa kakulangon sa kagamhanan sa obligasgon niini paghatag og ayuda ngadto sa mga nanginahanglan, ilabina niadtong grabe nga naapektohan sa pandemiya.       

Nagkalainlaing rason ang nagpalibot sa pagsulbong niining mga community pantry sa nagkalainlaing lugar sa nasud. Ug dili angay nga ipamulitika kining mao nga inisyatiba sa mga nagpakabana sa atong komunidad nga walay laing tumong kondili ang pagtabang sa mga nanginahanglan.

Kining maong pagpahigayon sa mga community pantry kabahin na sa kultura nga Pilipinhon nga pagtabang sa uban. Dugay na kaayo nato nga gisagop kini. Dili ba nga nailhan na kitang mga Pilipino sa atong “bayanihan spirit” bisan asang suok sa kalibotan kita napadpad?

Angay lamang nga pasagdan nato nga mosulbong pa kining maayong gawi sa uban natong mga tagi lungsod. Hinaut nga magpadayon pa kining mga community pantry. Ug hinaut nga dili kini sagolan og pamulitika ug red-tagging sa uban nga walay laing tuyo kondili ang pagbungkag lamang niining maayong katuyoan.