Jose ang mamumuo
Matag Mayo Uno saulogon gyud nato ang Labor Day. Tukma usab nga sa maong kasaulogan ato pud gihandom si San Jose ang Mamuo.
Nagpasabot kini nga balaanon ug sagrado gyud kaayo ang pagtrabaho. Matag tawo kinahanglang mohimo sa ingon aron mas makahuloganon ug dunay dignidad ang pagpakabuhi.
Malisod ang pagpuyo sa kinabuhi nga dawat lang og limpyo. Makaululaw kaayo kini.
Way luna sa kalibotan ang modawat lang og limpiyo. Ang tanan kinahanglan nga dunay himoon aron mabuhi
Si Jose hilom ra gyud nga tawo. Walay ni usa ka pulong nga napatik sa balaang kasulatan nga gikan kaniya.
Naila lamang siya nga panday. Iyang natudloan sa matang sa panginabuhi ang iyang anak nga si Jesus. Ilang gipatulo ang ilang kaugalingong mga singot aron dunay mahatud sa talad kan-anan nga kalan-on matag adlaw.
Ang maong kalan-on balaanon kay hinagoan man ug dili man pinaspasan. Dili maayong pakan-on ang matag sakop sa pamilya sa kinitaan nga way hinungdan.
Daghan nato ning kapanahonan ang nahigmata sa panlantaw nga kinahanglang magkugi aron moasenso sa kinabuhi.
Dunay pipila nga nahimong mga adunahan sa ilang paningkamot apan nahikalimot sa elemento sa pagtabang sa uban.
Dunay uban hinuon nga sa ilang naabot nga kahimtang nahimo silang all the more nga manggihatagon sa uban.
Dunay mga butang nga kinahanglang i-retain ug dunay mga angayang i-dispose apil na niini ang mga walay hinungdang attachments nga usahay maoy makapahimulag kanato sa tinud-anay nga diwa sa pagkakatilingbanon.
Si Jose hilom man tuod apan daghan og nahimo. Ug siguro ako sanglit siya sa Dios mahigugmaon man ang nibuhat sa mga buluhaton niya isip amahan ug bana pinasikad diha sa paghigugma. Kay ang pagpamuhat nga subay sa gugma balaanon man pud kaayo. Dili ba?
- Latest