EDITORYAL - Kaluwasan sa magbisekleta
Dunay ipahigayong basic safety and techniques training ang Sugbo Bike Lanes Board alang sa mga tawong mogamit og bisekleta sa ilang inadlaw-adlaw nga transportasyon.
Ang tumong niini nga matudloan ang mga bikers sa luwas nga pagbisekleta diha sa kadalanan sa siyudad karon nga gihatagan na sila og kaugalingong agianan o mga bike lanes sa kadalanan sa siyudad.
Apan siguro nga ang motambong niini mao ra gihapon kadtong mga professional bikers alang sa dugang nilang kasayuran ug mga pangutana.
Daghan na karon ang nagbisikleta tungod sa kanihit sa pasaheroan, apan makita nga kadaghanan aning mga professional bikers mao ra sab ang motuman sa mga lagda sa trapiko, ang uban nakigpatentiro sa mga dagkong sakyanan ug wala magpakabana sa ilang kaluwasan ug kun makaamong sila og motorista.
Kadaghanan kanang mga yanong trabahante nga mag bisekleta kada adlaw padung sa trabahoan ug pauli mao may sagad dili mosunod sa lagda sa trapiko ug usahay dili gani mosubay sa ilang bike lanes tungod kay nagdali.
Kini sila maoy angay targeton sa siyudad nga maagni pagtambong aning maong training kay sila may sagad mo-violate sa mga lagda sa trapiko ug mao kanunay ang madasmagan sa mga sakyanan.
Mas masayong kining training adto himuon sa kabarangayan inabagan sa barangay sa mga adlaw nga walay trabaho sanglit dili mo-absent kining mga trabahador para lang niana.
Mahimo sab ipaagi ang information drive pinaagi sa pamantalaan ug mga sibyaanan aron bisan kadtong dili makatambong may kahigayonang makapaminaw o makabasa. Ubos sa City Ordinance 2408 o Sugbo Bike Lanes Ordinance kinahanglang kondisyon sab ang bisekleta sa bikers, kompleto og brakes, warning lights o reflectorized stickers, helmet, ug uban pa.
Sagad sa mga aksidenteng nalambigit ang bisekleta mao kadtong mosugat sa traffic, pataka og sagol uban sa mga dagkong sakyanan, dili motahod sa “stop signal,” way reflectorized sticker o blinker lights, wala magsuot hayag nga kolor sa sinina panahon sa gabii ug uban pa.
Pinaagi niining ordinansa mapugos gyud pagpaayo kining magbisekleta sa ilang mga bisekleta aron dili makamulta.
- Latest