Ubay-ubay na ang nabakunahan apan dako pa kaayo’g kulang

Sa una lang nga adlaw sa pagpangbakuna, 634 dayon ka senior citizens ang nabakunahan, nagpasabot nga wala diay mahadlok ang mga senior citizen sa vaccine batok sa COVICD-19. Ug Sa atong pagsulat niini, nagpadayon pa ang pagpangbakuna, ug sa mga pictures sa cellphone sa akong anak, akong nakita ang nagdasok nga mga senior citizen, diin matud ni Konsehal Dave Tumulak, ang uban kanila diha na sa Galleria sa alas 6 pa sa sayong buntag.

 Excited, ug wala sila pagtuo nga panghadlok sa uban nga kuyaw ang pagpabakuna, dili safe, ug wala konoy kaseguroan nga dili na matakdan sa virus.

Ug nakanindot niini, kay wala kunoy adverse effect nga nabati ang nabakunahan, sa ato pa, safe ug dili angayan kahadlokan. 

Ang target, matud ni Dr. Jeffrey Ibones, officer-in-charge sa City Health Office, nga hutdon gayud ang 5,000 doses sa Sinovac hangtud karong adlawa, uban sa average nga 500 ka seniors ang makabunahan sulod sa matag duha ka vaccination sites.

Mahimo magparehistro pinaagi sa online: www. Pabakuna Ta.com. Kining maong website mo-complement kini sa registration site sa dakbayan: https://mics.cebucity.ph/vims/

Si Kapitan ug Konsehal Franklyn Ong, presidente sa Association Barangay Councils, nagpahibawo nga ilang gibutangan og barangay vaccination registration desk ang matag 80 ka barangay, paghatag og  kasayon niadtong buot nang magpakuna.

Akong banabana, modul-an na tingali og kapin sa tulo ka libo ang nabakunahan na nga mga senior citizen. Daghan na kaayo kini paminawon, apan, pila ra kaha kini ka porsiyento sa dul-an 100,000 ka senior sa dakbayan. Ug pila pa ka doses ang gikinahanglan?

* * *                                                                               

Sa ato nang nahisgutan dinhi, ang sector nga mas nagkinahanglan og mga pagtagad ug pag-amoma, mao ang mga senior citizen, ang mga older adults, matud pa.

Matud pa, ang lockdown nga pagkabilanggo sulod sa panimalay gumikan sa pandemic, nga naghikaw kanila sa pagpakigkita sa ilang mga kabanay ug kahigalaan, kini nagdala’g unprecedented nga kahadlok, kabalaka, ug ka-walay kaseguroan sa unsa pay mahitabo sa sunod nga mga adlaw.

Sa ato nang giingon, ang kalaay ug kamingaw mao na karon ang gihambin sa mga senior citizen, lakip na ako. Busa, gikinahanglan karon ang helping hand, nga aron dili sila mapasagdan nga mag-inusara.

Matud pa, kining helping hand, “they need it now more than ever.” Dili lalim nga ikaw mapasagdan ug mag-inusara. Ilabina kon nagpuyo ikaw layo gikan sa imong banay. Alang sa mga elderly ug mga retirees, lisud na lang kanila ang pagpanagang sa sakit gumikan sa pagkahinay ug pagkaluya na sa ilang immune system.

Matagkaron ug unya, kinahanglan nga ato silang makontak ug ka-istoryahan o duawon gyud, ug palitan sa ilang mga essentials sama sa pagkaon ug gi-maintain nga tambal ug vitamins. Ug pagpahinumdom kanila sa mga health standards.

Giingon dinhi, nga sa kanunay maka-feel sila nga wala sila mag-inusara, wala sila pasagdi ug connected gihapon sila sa ilang mga minahal sa kninabuhi nga nagmahal kanila, nga kabahin o involved gihapon sila sa inadlaw nga panikaysikay sa ilang mga kabanay.

Sa laktod, take good care of your elderly pagbatok sa ilang depression, kalaay ug kamingaw. Ug ikaga ug i-encouraged sila pagpabakuna.