Isda ug lana sa West Philippine Sea

Tungod sa mga pagsaway nga walay baruganan sa pagpangilog sa China sa West Philippine Sea,  gipadayag ni Presidente Rodrigo Roa Duterte niadtong Lunes sa gabii atol sa iyang pagpakighinabi sa katawhan nga iyang ipadala ang pipila ka mga barkong igugubat sa Pilipinas kun magsugod na ang China sa paglungag ilawom sa dagat aron sa pagkuha og lana ug ubang mga mahalon nga butang sa dapit.

Gibirahan usab ni Presidente Rodrigo Roa Duterte kadting mga nanaway kaniya ug gusto nga komprontasihon ang China tungod sa pagpadala og 200 ka mga militia ug barkong igugubat sa West Philippine Sea nga nasulod sa Exclusive Economic Zone sa Pilipinas.

Mensahi sa Presidente ngadto sa China: gusto niyang magpabilin ang panaghigala sa Pilipinas ug China. Dili siya interesado sa panagat tungod kay wala nay isda nga lalisan sa dapit. Apan sa panahon nga mosugod na sa paglungag ang China sa dapit iya nang ipadala ang barko nga igugubat sa Pilipinas.

Sa pagkakaron, wala siyay mahimo bisan pa man og molangoy siya didto sa West Philippine Sea tungod kay dili ang Pilipinas ang nagkontrolar sa dagat. Ang China miinsister nga ila ang West Philippine Sea. Mahimong dugoon ang pagkuha sa Pilipinas sa West Philippine Sea.

Ang isyu sa West Philippine Sea magpabiling pangutana hangtod nga moabot ang panahon nga makuha pagbalik sa Pilipinas ang West Philippine Sea. Makuha lang pagbalik ang West Philippine Sea pinaagi sa kusog. Walay laing paagi nga makuha kini pagbalik kun dili pinaagi sa dugoong paagi matud pa sa Presidente.

Apan ang pipila ka mga magbabalaud miingon nga wala kinahanglana nga mahimong dugoon ang pagpamugos sa Pilipinas sa dagat sa West Philipine Sea tungod kay wala gubata sa China ang Vietnam, Malaysia ug ubang nasud nga misuki sa gihimo sa China sa ilang dagat.

 Sa laing bahin, dinhi makita nato sa baruganan sa President nga iya lang gibaliwala ang mga mananagat ug gipalabi ang lana.