EDITORYAL - Namatay human nabakunahan
Dunay mga balitang mga Sugboanong nangamatay pipila ka adlaw human sila nabakunahan og pangontra sa coronavirus.
Ang ingon niini nga klase sa mga panghitabo ang dili gusto madungog ni bisan kinsa karong mga panahona nga ang kadaghanan nagapos sa balay.
Aduna nay gihimong imbestigasyon ang mga kadagkoan sa Department of Health kabahin sa maong mga report. Sa pagkakaron, ang DOH-7 nakasugod na sa pagpamakuna pinaagi sa Sinovac gikan sa China ug Astrazeneca gikan sa COVAX sa World Health Organization.
Una sa prayoridad ang mga medical health workers, gisunod ang mga barangay frontliners. Ang Sinovac maoy unang bakunang naabot mao nga pagkakaron anaa na sa ikaduhang dose ang ilang gihatag.
Samtang ang Astrazeneca padayon pa gihapon sa pagpamakuna sa unang dose, matud pa sa report. Ang tanang mga gibakunahan gipatubag sa mga pangutana mahitungod sa ilang medical nga kondisyon ug pinaagi niini makadesider ang mga doktor kun mahimo ba silang hatagan sa maong bakuna. Angay masayod ang publiko nga ang tanang mga bakuna batok COVID-19 karon sa tibuok kalibotan anaa pa ubos sa gitawag nga “clinical trials” mao nga espesyal ang mga permits paggamit niini nga gitawag og “emergency use authority.”
Apan bisan pa man sa mga pagduda nga may kalambigitan ang maong mga bakuna sa nahitabo sa maong mga indibidwal, dili husto nga tuohan kini dayon nga walay basihang nakab-ot pinaagi sa imbestigasyon sa mga doktor ug eksperto aning butanga.
Kining ingon niini nga mga balitang dunay namatay makaapektar sa paningkamot sa gobiyerno nga daghan ang mabakunahan batok sa COVID-19. Apan makatabang kini pagperpekto sa mga bakuna sa umaabot nga panahon. Kung buot hunahunaon, sa milyones ka doses sa mga COVID-19 vaccines nga nahatag na sa tibuok kalibotan, pipila palang gyud ang mga nakalas human sila nabakunahan.
Mao nga mahinungdanon gyud nga sigurado ang mga gibakunahan sa kahimtang sa ilang panglawas ayha sila magpabakuna.
- Latest