Namatay sa bakuna?

Ang bakuna batok sa COVID-19 maoy gidudahan sa pamilya sa usa ka kawani sa Vicente Sotto Memorial Medical Center nga nakaingon sa pagsul-ong sa iyang sakit nga hubak hinungdan sa kalit niyang kamatayon.

Ang 37 anyos nga si Sydney Rose Panimdim, lumulopyo sa Barangay Tangke sa dakbayan sa Talisay, namatay niadtong Domingo, duha ka adlaw human siya nakadawat sa ikaduhang dose sa bakuna.

Matud sa pamilya nga kanhi hubakon ang biktima apan taud-taod na nga wala motukar ang iyang sakit sukad sa pagpanganak niini sa ikaduha nilang anak sa iyang kapuyo nga si Jemar Villaceran.

Apan human siya nakadawat sa unang dose sa bakuna batok sa COVID-19 niadtong Marso 9, gikatahong misul-ong ang iyang hubak ug nakasinati siya og pagpamuwa sa iyang panit isip epekto.

Nahanaw ra usab hinuon kini dayon. Apan niadtong miaging Semana dihang gihatagan siya sa ika-duhang dose sa bakuna, giingon nga misuol ang iyang hubak nga maoy naingnan sa iyang kamatayon.

Tiglimpiyo si Panimdim sa VSMMC hinungdan nga apil siya sa mga unang nakadawat sa bakuna.

Ang Department of Health miingon nga dili pa klaro ang bakuna ba gyud ang hinungdan sa kamatayon ni Panimdim.

Si Dr. Mary Jane Loreche miingon nga susihon pa nila ang records ni Panimdim.

Dili husto nga ipasangil dayon sa bakuna ang iyang kamatayon hangtud nga dunay klarong resulta sa imbestigasyon.

Apan dili sab maayo nga maglangaylangay ang DOH paghatag og katin-awan sa hitabo tungod kay makaepekto ni sa pagsalig sa katawhan sa bakuna.

Niadto pang Domingo namatay si Panimdim apan nganong hangtud ron wala pa makahatag ang DOH bisan initial nalang nga report sa iyang record sa bakuna?

Didto sa record masuta unsay naobserbahan sa mga mananambal dihang gihatagan siya sa bakuna.

Tinuod ba nga dunay side effects sa una palang niya nga dose? Sa mga sitwasyon nga sama niini importante ang dinalian nga pagpasabot sa mga tinugyanan sa DOH aron dili maapektuhan ang pagsalig sa katawhan sa bakuna.

Matud sa DOH kinahanglanon ang autopsy aron masuta bakuna ba gyud ang nakaingon sa iyang kamatayon.

Apan unsaon paghimo niini nga dili naman mosugot ang pamilya nga ugkaton pa ang iyang patay'ng lawas?

Ngano man nga wala ni himoa daan sa DOH sa wala pa malubong ang iyang lawas? Unsay nahitabo sa ilang monitoring sa mga tawo nga nakadawat na sa bakuna?

Dili ba apil man ni sa ilang tahas nga bantayan ang mga nahatagan sa bakuna kun wa bay dautang epekto sa ilang panglawas?