Siya’y nipasidaan sa problemang wa niya ilha
Makapabalaka nang daan nga ang lider napamatud-an lapas sa tanang pagduda nga di kamaong mosulbad sa problema mao nga nisamot hinuon kapin sa tuig human sa unang pagtumaw. Makahahadlok kon ang lider mousab sa mga panghitabo aron pagtabon sa kapakyas pagtuman sa iyang trabaho.
Kuwestiyonable nang daan kon ang lider di moangkon nga dunay problema maong wa magtagad sa pagpatuman og sulbad.
Mas dakong eskandalo dihang ang lider niinsistir sa niaging gabii nga siya diay ang unang nipasidaan dihang umaabot pa ang problema nga hangtod sa niaging gabii wa niya ilha.
* * *
Tuguting maghisgot lang ko og duha ka pangangkon ni Presidente Rodrigo Duterte sa iyang pag-atubang sa nasudnong telebisyon sa niaging gabii nga kinahanglang kurhian sa labing daling panahon sa di pa mahiloan ang panghunahuna sa katawhan sa iyang troll army:
Nga usa siya sa labing una nga nipasidaan sayo sa niaging tuig nga mahimong pandemya ang COVID-19; ug
Nga nipasidaan sab siya sa niaging tuig nga mag-ilogay sa nihit nga suplay sa mga bakuna sa COVID-19 ug nga kay di man dato ang Pilipinas maiwit ta sa pagpamakuna.
* * *
Ang mosunod mao ang tinuod nga gipanulti ni Presidente Duterte sa niaging tuig:
Pebrero 3, 2020: Gipasaligan niya ang mga Pilipinhon nga di kahadlokan ang kagaw kay di mahitabong makakatap tungod sa kainit sa Pilipinas ug di sila mataptan kay kublan ang mga Pilipinhon; ug
Agosto 2020: Nagbalikbalik siya og pasalig nga ang Pilipinas apil sa labing una nga makakuha og bakuna tungod sa iyang kasuod nilang Presidente Xi Jinping sa China ug Presidente Vladimir Putin sa Russia.
* * *
Pulos napamatud-ang sayop ang duha niya ka pasalig: Ang Pilipinas ang kinadaghanan og bag-ong kaso sa COVID-19 sa tibuok Southeast Asia nga naglakip sa Indonesia nga may populasyon nga 270 milyones; ug kita say ikaduhang iwit sa pagpamakuna sa Asya, bugtong nasud nga mas uwahi mao ang Thailand.
Kay di na man katabonan ang mga palpak, naghimo si Presidente Duterte og alternatibo nga mga panghitabo aron pagpakita nga siya ang kinangilngigan sa pagsuhid sa umaabot sa kalibotanong katalagman.
Ug pagpaneguro nga malipat ang katawhan, giwaswasan na sab ang gipatuong mga baho ni Senador Leila de Lima.
* * *
- Latest
